FLASH
Shkruar nga Pamfleti
I shkarkuar nga sistemi i drejtësisë për probleme me pasurinë, Elio Mazreku rikthehet në një nga sektorët më të ekspozuar ndaj korrupsionit. Emërimi i tij në krye të Hetimit Doganor ngre pikëpyetje të rënda për standardet e qeverisë dhe lidhjet që mbijetojnë përtej reformës në drejtësi.
Reforma në drejtësi u shit si operacioni më i madh i pastrimit institucional që kishte njohur ndonjëherë Shqipëria. U premtua se kush nuk justifikonte pasurinë, kush dështonte përballë filtrave të vetingut dhe kush nuk përmbushte standardet e integritetit, do të largohej përfundimisht nga funksionet publike që lidhen me ligjin dhe interesin e qytetarëve.
Por Shqipëria vazhdon të prodhojë paradokse që asnjë reformë nuk arrin t'i zgjidhë.
Elio Mazreku u largua nga sistemi i drejtësisë pas procesit të vetingut. Komisioni i Pavarur i Kualifikimit konstatoi probleme serioze në kriterin e pasurisë dhe një bilanc negativ financiar prej miliona lekësh. Ky ishte vendimi që e nxori jashtë sistemit një prokuror, në emër të standardeve që reforma pretendonte të vendoste.
Sot, i njëjti person emërohet në krye të Hetimit Doganor.
Kjo nuk është thjesht një lëvizje administrative. Kjo është një goditje e drejtpërdrejtë ndaj vetë logjikës së reformës në drejtësi.
Doganat përbëjnë një nga nyjet më të ndjeshme të shtetit shqiptar. Aty kalojnë miliarda euro mallra, interesa të mëdha biznesi, akciza, taksa dhe një histori e gjatë skandalesh që kanë shoqëruar çdo qeveri. Çdo raport ndërkombëtar për korrupsionin në Shqipëri ka identifikuar doganat si një nga sektorët me risk të lartë për abuzim dhe ndikim klientelist.
Në çdo shtet normal, një zyrtar që nuk kalon filtrat e integritetit për të ushtruar detyrën e prokurorit do ta kishte të vështirë të merrte drejtimin e një strukture kaq të ndjeshme financiare. Në Shqipëri ndodh e kundërta. Shkarkimi nuk shërben si pengesë. Shkarkimi shërben si trampolinë për një post tjetër.
Akoma më shumë pikëpyetje ngre fakti se Mazreku njihet si familjar i ish-Prokurores së Përgjithshme Ina Rama. Kjo lidhje familjare nuk përbën në vetvete shkelje ligjore. Por në një vend ku rrjetet familjare, klienteliste dhe politike kanë dominuar për dekada administratën publike, publiku ka të drejtë të dijë nëse emërime të tilla burojnë nga meritokracia apo nga lidhjet.
Qeveria ka detyrimin të shpjegojë se cilat ishin kriteret që e bënë një person të shkarkuar nga vetingu kandidatin më të përshtatshëm për të drejtuar Hetimin Doganor. Çfarë cilësish gjeti administrata te një ish-prokuror që nuk arriti të bindte organet e rivlerësimit për pasurinë e tij? Kush e propozoi? Kush e mbështeti? Kush mori përgjegjësinë politike për këtë emërim?
Këto nuk janë pyetje personale. Janë pyetje që prekin besimin e qytetarëve te shteti.
Sepse kur reforma largon një zyrtar nga dera dhe pushteti e rikthen nga dritarja, qytetarët kuptojnë se problemi nuk qëndron te ligjet. Problemi qëndron te sistemi që riciklon të njëjtët emra, të njëjtat lidhje dhe të njëjtat mekanizma ndikimi.
Në fund, mesazhi që merr publiku është i qartë. Në Shqipëri mund të humbasësh statusin e prokurorit për shkak të vetingut, por kjo nuk të pengon të marrësh drejtimin e një sektori ku kalojnë interesa financiare shumë më të mëdha. Kjo nuk është fitore e reformës. Kjo është dëshmi se kasta e vjetër e pushtetit vazhdon të mbijetojë, të përshtatet dhe të riciklojë vetveten, pavarësisht emrit që i vendoset reformës së radhës./Pamfleti
Do haje ky, nuk rri dot pa tepsi
Sa e rrezikshme paska qene kjo
A e keni konfirmuar ju si redaksi kete emerim ? Sepse ne te kundert ate qe kane vendosur per ta emeruar tek doganat kete ish prokuror, duhet kallzuar ne SPAK.
Elio eshte djale edhe i zgjuar, edhe i drejte. Besoj do e beje mire detyren e re.
Ashtu eshte, vetem se pervec se largimit me turp nga vettingu dhe ky emerim i kundraligjshem dhe me pasoja per te gjithe, ka nderhyre edhe neper dosjet e kolegeve. Por i kane qelluar te kete pasur kolege te mire, ama dhe ja lane ne dore te Zotit. Si thote shprehja, e kerkofsh prej meje, e gjetsh prej dikujt tjeter te keqen.
Ne te gjitha drejtorite e institucioneve duhen vendosur prokuroret qe jane shkarkuar nga puna.