FLASH
Shkruar nga Pamfleti
Pas Sportingut të Lisbonës, edhe tre skuadra të tjera kanë prerë biletën për në çerekfinalet e UEFA Champions League: Arsenali, PSG-ja dhe Reali i Madridit.
Arsenali siguroi kualifikimin pas fitores 2-0 ndaj Bajer Leverkusenit në ndeshjen e kthimit, duke përfituar edhe nga barazimi 1-1 në takimin e parë.
Skuadra londineze zhbllokoi rezultatin në minutën e 36-të me Ebereshi Eze, i cili finalizoi saktë nga distanca pas një asistimi të Leandro Troshard. Në pjesën e dytë, në minutën e 63-të, Deklan Rajs dyfishoi shifrat me një goditje të fuqishme nga jashtë zonës, duke vulosur kualifikimin.
PSG-ja konfirmoi epërsinë e ndeshjes së parë (5-2) duke fituar edhe në transfertë ndaj Çelsit me rezultatin 0-3 në “Stamford Bridge”.
Francezët kaluan në avantazh që në minutën e 6-të me Kviça Kvaratskhelia, pas një aksioni individual. Vetëm tetë minuta më vonë, Bredli Barkola dyfishoi rezultatin pas një kundërsulmi të shpejtë. Golin e tretë e shënoi Seni Majulu në minutën e 62-të, duke vulosur një kualifikim bindës për PSG-në.
Reali i Madridit triumfoi edhe në ndeshjen e kthimit ndaj Mançester Sitit me rezultatin 1-2, pas fitores 0-3 në takimin e parë.
Vinicius Zhunior hapi serinë e golave në minutën e 22-të nga pika e penalltisë, e fituar nga vetë ai. Në të njëjtin rast, Bernardo Silva u ndëshkua me karton të kuq për prekje të topit me dorë. Siti barazoi në minutën e 41-të me Erling Haland, por në kohën shtesë Vinicius shënoi golin e dytë personal, duke siguruar fitoren për madrilenët.
Për Realin e Madridit, ndeshja u shoqërua edhe me zhvillime të kundërta: portieri Tibo Kurtua pësoi dëmtim, ndërsa një lajm pozitiv ishte rikthimi në fushë i Kilian Mbape.
Lini një Përgjigje