FLASH
Shkruar nga Pamfleti
Që nga aksidenti tragjik në Meribel në dhjetor të vitit 2013, rreth Majkëll Shumakerit është ndërtuar një mur pothuajse i padepërtueshëm heshtjeje.
Me kërkesë të familjes, nuk janë publikuar kurrë buletine zyrtare mjekësore dhe informacionet mbi gjendjen e ish-pilotit të Ferrarit kanë qenë gjithmonë minimale dhe të kontrolluara me kujdes.
Vetëm një rreth shumë i kufizuar personash ka pasur akses në banesën ku Shumaker po kurohet prej vitesh. Mes tyre përmenden emra historikë të botës së Formula 1, si Zhan Tod, Luka Badoer dhe menaxherja e tij e hershme, Sabin Kehm.
Së fundmi, një emër i papritur ka hyrë në këtë listë shumë ekskluzive, duke krijuar një lidhje të pazakontë mes botës së Formula 1 dhe tenisit modern. Bëhet fjalë për Laila Hasanoviç, modelen daneze dhe partneren aktuale të Janik Siner.
Sipas raportimeve të “Daily Mail“, Hasanoviç është një nga të paktët persona në botë që e di të vërtetën mbi gjendjen shëndetësore të Majkëll Shumakerit. Para lidhjes me kampionin italian të tenisit, Laila kishte pasur një marrëdhënie të rëndësishme me Mik Shumaker, djalin e legjendës së Ferrarit.
Gjatë asaj periudhe, ajo arriti të fitojë besimin e plotë të familjes Shumaker, veçanërisht të bashkëshortes së Majkëllit, Korina Shumaker. Ky besim i hapi dyert e një privilegji shumë të rrallë: hyrjen në shtëpinë private të familjes dhe takimin personal me Majkëll Shumakerin.
Edhe pse marrëdhënia me Mik Shumaker ka përfunduar, Laila Hasanoviç ka vazhduar të respektojë me diskrecion absolut privatësinë e familjes dhe sekretin që i është besuar, duke mos zbuluar asnjë detaj mbi gjendjen e ish-kampionit shtatë herë të botës në Formula 1.
Një tjetër dëshmi se, edhe pas më shumë se një dekade, emri i Majkëll Shumaker mbetet i rrethuar nga misteri, respekti dhe heshtja, ashtu siç ka kërkuar gjithmonë familja e tij.
Lini një Përgjigje