FLASH
Shkruar nga Pamfleti
Sulmuesi i njohur, Mihail Antonio, ka arritur një marrëveshje afatshkurtër me klubin katariot Al-Sailiya, duke shënuar rikthimin e tij në futbollin e klubeve pas një periudhe të gjatë mungese për shkak të një aksidenti të rëndë automobilistik.
Antonio, 35 vjeç, nuk kishte zhvilluar asnjë ndeshje me klub që nga dhjetori i vitit 2024, kur pësoi një aksident automobilistik në Epping, Essex. Si pasojë e përplasjes së makinës së tij Ferrari FF me pemët, ai theu këmbën në katër vende. Vetë lojtari ka deklaruar më herët se ishte ndjerë “afër vdekjes” pas aksidentit.
Pas ndërhyrjeve mjekësore dhe një periudhe të gjatë rehabilitimi, Antonio iu rikthye stërvitjes me ekipet e të rinjve të West Ham, Brentford dhe Leicester, por nuk arriti të nënshkruante kontratë me asnjë prej tyre në atë kohë.
Në qershor të vitit të kaluar, ai u rikthye përkohësisht në fushë me kombëtaren e Xhamajkës, duke regjistruar tre paraqitje si zëvendësues. Megjithatë, përpjekjet për të siguruar një kontratë në nivel klubi hasën në vështirësi.
Antonio zhvilloi bisedime me klubin e Championship-it, Charlton, madje iu nënshtrua edhe testeve mjekësore, por marrëveshja nuk u konkretizua. Një mundësi e mëparshme me Leicester ishte ndërprerë për shkak të një dëmtimi muskulor që ndaloi negociatat.
Në këtë kontekst, Al-Sailiya paraqiti ofertën për sulmuesin, e cila u finalizua si një kontratë afatshkurtër. Klubi katariot aktualisht renditet në vendin e nëntë në Ligën e Yjeve të Katarit, katër pikë mbi zonën e rënies nga kategoria. Në përbërje të skuadrës është edhe ish-mbrojtësi i Evertonit, Mason Holgate.
Sipas marrëveshjes, Antonio do të aktivizohet në gjashtë ndeshjet e mbetura të sezonit, i cili përfundon në muajin prill.
Gjatë kohës së rikuperimit, Antonio u angazhua edhe si analist futbolli, duke iu bashkuar ekipit të TNT Sports për sezonin 2025/26. Megjithatë, nënshkrimi me Al-Sailiya shënon një rikthim aktiv në fushën e lojës.
Ky hap konsiderohet si një përpjekje për të rifituar formën konkurruese dhe për të vazhduar karrierën, pas një periudhe që vetë lojtari e ka përshkruar si ndër më të vështirat në jetën e tij profesionale dhe personale.
Lini një Përgjigje