FLASH
Shkruar nga Pamfleti
Presidenti amerikan i cilësoi "qesharake" shpenzimet gjermane për mbrojtjen para samitit të NATO-s, ndërsa kancelari Friedrich Merz theksoi se Gjermania po dyfishon buxhetin e saj të mbrojtjes brenda katër vjetësh...
Presidenti i Shteteve të Bashkuara, Donald Trump, ka kritikuar ashpër shpenzimet e Gjermanisë për mbrojtjen, duke i cilësuar ato "qesharake" në një postim në platformën Truth Social, pak para samitit të NATO-s që pritet të zhvillohet në Ankara. Ai kritikoi gjithashtu edhe aleatë të tjerë të NATO-s, përfshirë Britaninë e Madhe dhe Italinë.
Trump ka shprehur prej kohësh pakënaqësi për faktin se SHBA-ja mban barrën më të madhe financiare të Aleancës në vlera absolute.
Kancelari gjerman Friedrich Merz hodhi poshtë kritikat e presidentit amerikan pas një takimi në Berlin me krerët e shteteve dhe qeverive të vendeve baltike.
"Gjermania po e dyfishon buxhetin e saj të mbrojtjes brenda katër vjetësh. Ky është angazhimi më i madh që kemi ndërmarrë ndonjëherë për të forcuar aftësitë tona mbrojtëse. Nuk kemi pse t'i fshihemi askujt për këtë," deklaroi Merz.
Ai shtoi se këtë qëndrim do ta paraqesë edhe gjatë samitit të NATO-s në Ankara më 7 dhe 8 korrik.
"Shtetet evropiane të Aleancës janë të vendosura të japin kontributin e tyre për mbrojtjen e NATO-s. Kjo duhet të pranohet nga kushdo që i analizon me seriozitet këto shifra," tha kancelari gjerman.
Sipas marrëveshjes së arritur në samitin e NATO-s në Hagë vitin e kaluar, vendet anëtare synojnë të investojnë të paktën 3,5 për qind të Prodhimit të Brendshëm Bruto (PBB) për mbrojtjen, si dhe 1,5 për qind shtesë për shpenzime të lidhura me sigurinë, si infrastruktura. Objektivi është që deri në vitin 2035 investimet totale në mbrojtje dhe siguri të arrijnë në 5 për qind të PBB-së, niveli më i lartë që nga Lufta e Ftohtë. Gjermania synon që deri në vitin 2029 të arrijë shpenzime për mbrojtjen në nivelin 3,5 për qind të PBB-së.
Pakënaqësia e Trump ndaj Berlinit lidhet edhe me qëndrimin e Gjermanisë për konfliktin mes Izraelit dhe Iranit. Gjatë një takimi javën e kaluar në Shtëpinë e Bardhë me Sekretarin e Përgjithshëm të NATO-s, Mark Rutte, presidenti amerikan u shpreh i zhgënjyer me qeverinë gjermane.
"Jam i zhgënjyer me Gjermaninë. U kërkuam të na mbështesnin, por ata refuzuan," tha Trump, pa e përmendur me emër kancelarin Merz.
Ai shtoi se Shtetet e Bashkuara shpenzojnë "qindra miliona dollarë" për trupat e dislokuara në Gjermani dhe në pjesë të tjera të Evropës.
Lini një Përgjigje