FLASH
Shkruar nga Pamfleti
Kualifikimi në Europian ishte një ëndërr e bërë realitet me kuqezinjtë që siguruan biletën si fitues të grupit në kualifikuese. Përgatitjet për aventurën gjermane kanë nisur prej muajsh me stafin teknik që ka ndjekur nga afër disa prej futbollistëve dhe do të vijojë ta bëjë deri në grumbullimin e parë.
Mirëpo, pasi u kalua edhe shorti i Ligës së Kombeve, përgatitjet tani nisin të intensifikohen. Lojtarët do të luajnë ndeshjet më vendimtare të sezonit me ekipet përkatëse dhe vëmendja e brazilianit dhe të besuarve të tij është absolute.
Në shërbim të Silvinjos do të luhen edhe 5 miqësore, dy të parat tashmë publike, me Kilin dhe Suedinë më 21 dhe 25 mars, në Bolonja dhe Stokholm. Testet miqësore do të shërbejnë për të finalizuar listën e lojtarëve për finalet e “EURO 2024”.
‘Halli’ më i madh për Silvinjon dhe gjithë homologët e tij në këtë kompeticion është se do të jenë vetëm 23 vende për të mbushur, ndryshe nga Botërori dhe Europiani i fundit ku pamë një listë me 26 lojtarë. Në kualifikuese, Silvinjo ka patur gjithmonë 25-26 lojtarë dhe përsëri kishte emra që mbeteshin jashtë, sidomos në repartin e sulmit.
Lidhur me këtë çështje është trajneri i Serbisë, Dragan Stojkoviç, i cili i ka dërguar një letër zyrtare UEFA-s për të zgjeruar listën në 25 lojtarë. Kërkesa e Stojkoviç nuk duhet nënvlerësuar, pasi ishte pikërisht ky që i bëri të njëjtën thirrje FIFA-s për Botërorin dhe qeveria e futbollit e pranoi atë.
Në këtë nismë të tij, ai pritet të marrë mbështetjen e shumë prej homologëve të Kombëtareve të tjera.
Lini një Përgjigje