FLASH
Shkruar nga Pamfleti
Tensionet ndërkombëtare dhe roli politik i presidentit amerikan rrezikojnë të ndikojnë atmosferën e Kupës së Botës që do të zhvillohet në SHBA, Kanada dhe Meksikë
Para se 48 ekipet të ndaheshin në grupe për Kupën e Botës 2026, presidenti i Shteteve të Bashkuara, Donald Trump, u ftua në skenë për të marrë një trofe.
“Ky është çmimi juaj për paqen,” tha presidenti i FIFA-s, Gianni Infantino, duke shtuar “ka edhe një medalje të bukur për ju që mund ta mbani kudo që të shkoni.”
Ndërsa Trump mori medaljen dhe e vari në qafë, fjalët e lavdërimit të FIFA-s ende jehonin në sallë.
“Ne nderojmë një lider dinamik që ka ndërmarrë përpjekje diplomatike që kanë krijuar mundësi për dialog, ulje të tensioneve dhe stabilitet”, tha narratori i një videoje 4-minutëshe që lanconte fituesin e parë të këtij çmimi të ri të FIFA-s.
Më pak se tre muaj më vonë, Trump foli me Jake Tapper të CNN lidhur me nismën e tij më të fundit të politikës së jashtme në Lindjen e Mesme: një luftë me Iranin.
“Po i godasim fort”, tha Trump për sulmet ajrore që kishte ndërmarrë së bashku me qeverinë izraelite. “Kemi ushtrinë më të fuqishme në botë dhe po e përdorim.”
Midis marrjes së Çmimit të Paqes nga FIFA dhe nisjes së operacionit “Epic Fury” në Lindjen e Mesme, Trump autorizoi veprime ushtarake kundër forcave të lidhura me ISIS në Nigeri në ditën e Krishtlindjeve dhe qeveria e tij ndërmori një ndërhyrje ushtarake në Venezuelë, duke kapur presidentin Nicolás Maduro. Ai gjithashtu vendosi në alarm aleatët e NATO-s me kërcënimin për marrjen nën kontroll të Grenlandës, çështje që u diskutua në takime intensive në Forumin Ekonomik Botëror. Ndërkohë, ai vazhdoi edhe ironitë ndaj Kanadasë duke e quajtur kryeministrin Mark Carney “guvernator”, në referencë me idenë e tij për ta bërë Kanadanë shtetin e 51-të të SHBA-së.
Megjithatë, veprimet kundër Iranit kanë dominuar të gjitha zhvillimet e tjera dhe kanë vendosur në qendër të vëmendjes çmimin e FIFA-s. Organizata botërore e futbollit shpesh thekson se loja e saj mund të bashkojë botën dhe të sjellë paqe, por nëse situata në Lindjen e Mesme përshkallëzohet më tej, Kupa e Botës rrezikon të errësohet nga një luftë e nisur nga njeriu që FIFA sapo e nderoi me Çmimin e Paqes.
FIFA nuk iu përgjigj një kërkese për koment për këtë artikull.
Një turne mes konflikteve globale
Kur festimet të fillojnë në SHBA, Kanada dhe Meksikë këtë verë, atmosfera ka të ngjarë të ndërlikohet nga tensionet dhe konfliktet në pjesë të ndryshme të botës.
Vetëm disa ditë para se SHBA të bashkohej me ushtrinë izraelite për të goditur objektiva në më shumë se një duzinë qytetesh iraniane, nga Tabrizi deri në Chabahar, duke vrarë edhe liderin suprem të Iranit, Ajatollah Khamenei, qeveria meksikane ndërmori një sulm të guximshëm kundër kartelit famëkeq Jalisco New Generation.
Baroni i drogës Nemesio Rubén Oseguera Cervantes, i njohur si “El Mencho”, u vra vetëm disa orë larg Guadalajarës, një nga 16 qytetet pritëse të Kupës së Botës. Trump kishte ushtruar prej kohësh presion ndaj homologes së tij meksikane, presidentes Claudia Sheinbaum, për të goditur kartelët, por vdekja e El Menchos mund të destabilizojë një nga vendet pritëse në një kohë kur mijëra tifozë futbolli planifikojnë të vizitojnë vendin.
Infantino deklaroi shpejt se kishte “besim të plotë” në aftësinë e autoriteteve meksikane për të organizuar me sukses ndeshjet e Kupës së Botës, por ai nuk mund të mohonte dhunën spontane që kishte lënë të paktën 70 të vdekur.
“Mexiko është një vend i madh; si në çdo vend tjetër të botës, ndodhin gjëra. Nuk jetojmë në Hënë apo në një planet tjetër,” tha ai, duke shtuar “prandaj kemi qeveri, polici dhe autoritete që do të sigurojnë rendin dhe sigurinë. Jemi të bindur se gjithçka do të zhvillohet sa më normalisht.”
Mexico City do të presë ndeshjen hapëse të turneut mes Meksikës dhe Afrikës së Jugut më 11 qershor, ndërsa qytetet e tjera pritëse në ven, Guadalajara dhe Monterrey, do të organizojnë edhe play-off-et ndërkontinentale më vonë këtë muaj.
Megjithatë, pas shpërthimit të dhunës, u ngritën spekulime se ndoshta këto ndeshje mund të zhvendoseshin në një vend më të sigurt. Një opsion i diskutuar ishte stadiumi Lusail në Katar, ku u zhvillua finalja e fundit e Kupës së Botës mes Argjentinës dhe Francës.
Por Katari u përfshi shpejt edhe vetë në konfliktin në Lindjen e Mesme, pasi Irani dërgoi një seri raketash balistike dhe dronësh përtej Ngushticës së Hormuzit. Në ditët e para të luftës, ushtria e Katarit njoftoi se kishte rrëzuar dy avionë iranianë SU-24.
Katari, Arabia Saudite dhe ndoshta Iraku do të marrin pjesë në Kupën e Botës këtë verë; Irani ka lëshuar raketa ndaj të tre këtyre vendeve ditët e fundit.
Kombëtarja iraniane e futbollit ishte e para që u kualifikua nga zona aziatike dhe kishte planifikuar të vendosej në Tucson të Arizonës, duke përdorur kompleksin sportiv Kino si kamp bazë. “Team Melli”, siç njihet ekipi, tani duhet të përballet me perspektivën e vështirë të mikpritjes nga një vend me të cilin qeveria e tij është në luftë.
Kjo nëse do të marrë pjesë fare. Presidenti i Federatës së Futbollit të Iranit, Mehdi Taj, tha se pjesëmarrja e ekipit tani është në dyshim.
“Ajo që është e sigurt është se pas këtij sulmi nuk mund të pritet që të shohim Kupën e Botës me shpresë,” tha ai për portalin sportiv Varzesh3.
Që nga turneu i vitit 1950 në Brazil, asnjë ekip nuk është tërhequr nga gara pasi është kualifikuar.
Tensionet SHBA–Iran vënë në provë Infantinon
Pavarësisht se çfarë vendimi do të marrë Irani këtë verë, pjesëmarrja e tij në turne ishte tashmë e ndikuar nga tensionet me SHBA-në.
Si rezultat i kufizimeve të reja të udhëtimit të vendosura nga Departamenti Amerikan i Shtetit, tifozëve iranianë u është bërë e ditur se nuk do të marrin viza për të hyrë në vend. Në dhjetor të vitit të kaluar, delegacioni iranian pothuajse bojkotoi shortin në Uashington, sepse mori vetëm katër nga nëntë vizat e kërkuara; presidentit të federatës, Mehdi Taj, iu refuzua leja për udhëtim.
Edhe tifozët nga Haiti, Bregu i Fildishtë dhe Senegali, dy kampionët më të fundit afrikanë, nuk do të marrin viza hyrjeje.
Në vitin 2017, një vit para se FIFA t’i jepte SHBA-së të drejtën për të bashkëorganizuar turneun, Infantino deklaroi: “është e qartë se kur bëhet fjalë për garat e FIFA-s, çdo ekip që kualifikohet për Kupën e Botës, përfshirë tifozët dhe zyrtarët, duhet të ketë akses në vendin pritës, përndryshe nuk ka Kupë Bote.”
Tani Infantino duket se ka shqetësime të tjera, ndërsa përgatitet të drejtojë turneun më fitimprurës në historinë 122-vjeçare të organizatës. Sipas analizës së Sports Value, ky Botëror pritet t’i sjellë FIFA-s të ardhura prej rreth 10.9 miliardë dollarësh, një rritje prej 56% krahasuar me turneun e fundit në Katar.
Ndërkohë, për shkak të marrëdhënies së tij të ngushtë me Trump, Infantino është shfaqur gjithnjë e më shumë në skenën politike, duke marrë pjesë shpesh në evente në Shtëpinë e Bardhë ose në ngjarje të mëdha sportive ku është i pranishëm presidenti amerikan.
Ai është fotografuar disa herë në Mar-a-Lago dhe në Zyrën Ovale, ka marrë pjesë në inaugurimin e mandatit të dytë të Trump dhe e ka shoqëruar atë në “Samitin për Paqe” në Egjipt, ku u diskutua e ardhmja e Gazës dhe lufta e Izraelit me Hamasin.
Një foto e Infantinos e shfaqur në videon e shortit të Kupës së Botës, ku ai bën një gjest entuziast me gishtin e madh lart, u përshkrua nga The Guardian si “si një baba krenar futbolli”.
Kodi i etikës së FIFA-s parashikon që organizata të jetë politikisht neutrale, por Infantino duket i rehatshëm në praninë e një prej liderëve më përçarës në botë. Në shkurt ai mori pjesë në një takim të Bordit për Paqe të Trump, duke mbajtur një kapelë të kuqe në stilin MAGA me numrat 45 dhe 47 – që tregojnë presidencat e Trump – të qëndisur në anë.
Një Kupë Bote e politizuar
Zakonisht presidenti i FIFA-s është figura më e fuqishme në prapaskenë gjatë një Botërori, por ky turne pritet të jetë i pazakontë, pasi Trump do të jetë vazhdimisht i pranishëm rreth aktiviteteve të tij.
Presidenti amerikan ka shfaqur shpesh trofeun e Kupës së Botës në zyrën e tij në Shtëpinë e Bardhë, duke thënë një herë: “çfarë pjese e bukur ari.”
Ai ka treguar gjithashtu gatishmëri për të përdorur sportin dhe atletët për mesazhe politike.
Vitin e kaluar, gjatë Botërorit të parë të klubeve të FIFA-s, Trump priti ekipin e Juventusit në Shtëpinë e Bardhë dhe, para kamerave, i pyeti lojtarët në mënyrë retorike nëse një grua mund të ishte mjaftueshëm e mirë për të luajtur në ekipin e tyre.
Në finalen në New Jersey, ai i dorëzoi trofeun Chelseat dhe qëndroi në skenë gjatë festimit të ekipit fitues. Në Ryder Cup në shtator, ai bëri gjithashtu një shfaqje të madhe duke fluturuar ulët mbi fushën e golfit Bethpage Black me avionin presidencial Air Force One.
Çfarëdo që të ndodhë në fushë, kjo Kupë Bote pritet të jetë shumë e politizuar. Turneu është përcaktuar si pjesë qendrore e festimeve për 250-vjetorin e Shteteve të Bashkuara, me plane që përfshijnë edhe “kamionë të lirisë” në zonat e tifozëve për të promovuar imazhin e vendit, sipas medias The Athletic.
Në këtë mënyrë, FIFA përballet me një pyetje të vështirë: nëse është e pavullnetshme apo thjesht e paaftë për të parandaluar që turneu i saj të përdoret politikisht nga një prej liderëve më të fuqishëm në botë dhe të mbulohet nga ngjarjet globale që ai ka nxitur. /Përshtatur nga Cnn/
Ne nje bisede televizive, ky trimi qe mban Kupen e Botes ne duar tha qe, Kupen e Botes te Kampioneve te Sheteve qe fitoi ne 2025 Cheksea e ka ne zyren e tij e do u ketheje ekipit te Chelsea nje kopje, se i pelqen origjinali. U mahnita ose me mire te them u tmerrova nga kjo logjike. Megjithese e pashe me syte e mi dhe e degjova po me veshet e mi e prape nuk me besohet. Si duket Botes nuk i ka mbetur me logjike morale e ndershmeri qytetare.