FLASH
Shkruar nga Pamfleti
Pep Guardiola mund të jetë një nga emrat që do të merret në konsideratë për drejtimin e kombëtares italiane në të ardhmen. Këtë mundësi e la të hapur ministri italian për Sportin, Andrea Abodi, i cili vlerësoi trajnerin spanjoll si një figurë të rëndësishme të futbollit botëror dhe nuk e konsideroi të pamundur një aventurë të tij në krye të “Azzurrëve”.
I pyetur për zërat që lidhin Guardiolën me pankinën e Italisë, Abodi theksoi se vendimtare nuk do të ishte ana financiare, por dëshira e vetë trajnerit për të ndërmarrë një sfidë të tillë.
“Duhet të kuptojmë nëse ai dëshiron Italinë. Ka shumë nga Italia në rrugëtimin e jetës së tij dhe unë besoj në ndjenjat e tij. Është pjesë e opsioneve të mundshme, sigurisht që nuk është një ëndërr e pamundur”, deklaroi Abodi.
Ministri nënvizoi se drejtimi i një kombëtareje është një rol ndryshe nga ai në nivel klubesh dhe se mbetet për t’u parë nëse Guardiola dëshiron të përballet me këtë sfidë.
“Ai është një trajner shumë i rëndësishëm. Trajneri i kombëtares është një profesion tjetër dhe duhet të kuptojmë nëse një trajner i jashtëzakonshëm është dhe dëshiron të bëhet gjithashtu një trajner kombëtareje i jashtëzakonshëm. Sipas meje, është një sfidë që ata duan ta marrin përsipër herët a vonë”, shtoi ai.
Abodi theksoi se suksesi i një kombëtareje nuk varet vetëm nga emri i trajnerit, por nga një projekt i gjerë dhe i mirëorganizuar në të gjitha nivelet e futbollit italian.
“Nuk mendoj se ka të bëjë me paratë, por me ambiciet dhe ëndrrat. Një trajner i vetëm nuk e bën një ekip kombëtar; duhet ta shoqërojë një projekt i nivelit të lartë. Duhet të entuziazmojë, si dhe të ndërgjegjësojë”, u shpreh ministri.
Ai kritikoi gjithashtu drejtuesit e futbollit italian për humbjen e standardeve të mëparshme të suksesit, duke kërkuar më shumë bashkëpunim mes klubeve, ligave dhe Federatës Italiane të Futbollit.
“Duhet të jetë një stimul për të rikuperuar fijen e përsosmërisë që kemi sakrifikuar për shkak të paaftësisë së klasës drejtuese, si në klube ashtu edhe në liga dhe në FIGC. Duhet të punojmë në një mënyrë të integruar për të arritur qëllimet dhe për të bashkëpunuar. Nuk është e mjaftueshme thjesht hapja e portave për të mbushur stadiumet”, përfundoi Abodi.
Lini një Përgjigje