FLASH
Shkruar nga Pamfleti
Borusia e Dortmundit ka reaguar pas humbjes së javës së kaluar ndaj rivalit direkt Bajern Mynih, duke marrë një fitore të rëndësishme në transfertë ndaj Këlnit me rezultatin 1-2. Edhe pse mbetet 11 pikë larg kreut të renditjes, skuadra verdhezi vijon të mbajë gjallë shpresat në garën për titull.
Dortmundi kaloi në avantazh në minutën e 16-të të pjesës së parë, kur Serhu Girasi realizoi golin e parë të takimit. Në fundin e pjesës së parë, vendasit mbetën me një lojtar më pak, pasi Jahmai Simpson-Pusej u ndëshkua për një ndërhyrje të rëndë nga pas ndaj Maksimilian Bejer.
Epërsia numerike u shfrytëzua nga mysafirët në pjesën e dytë. Në minutën e 60-të, Maksimilian Bejer dyfishoi shifrat për Dortmundin, duke i dhënë skuadrës një avantazh të rëndësishëm.
Këlni reagoi vetëm në minutat e fundit të ndeshjes. Jakub Kaminski shënoi në minutën e 88-të, duke ngushtuar diferencën, por pa arritur të shmangë humbjen.
Me këtë fitore, Borusia e Dortmundit ruan vendin e dytë në renditje me 55 pikë, ndërsa Këlni mbetet në vendin e 13-të të tabelës.
Lini një Përgjigje