FLASH
Shkruar nga Pamfleti
Komo ka marrë një fitore të rëndësishme në transfertë ndaj Kaljarit, duke triumfuar me rezultatin 2-1 në stadiumin “Unipol Domus”, në kuadër të javës së 28-të të Serisë A. Me këtë sukses, skuadra e drejtuar nga Çesk Fabregas ngjitet në vendin e katërt të klasifikimit, duke barazuar Romën me 51 pikë.
Skuadra mike e nisi ndeshjen në mënyrë të shkëlqyer dhe arriti të zhbllokojë rezultatin që në minutën e 14-të. Baturina përfitoi nga një situatë e krijuar në zonë pas një përplasjeje mes Dosenës dhe Da Kunjës, duke reaguar më shpejt se mbrojtësit dhe duke e dërguar topin në rrjetë për avantazhin e Komos.
Megjithatë, në minutën e 36-të, Komo u përball me një problem të rëndësishëm, pasi humbi mesfushorin Perrone për shkak të një dëmtimi në pjesën e pasme të kofshës, çka e detyroi stafin teknik të bëjë zëvendësim të detyruar.
Kaljari u shfaq më pak i rrezikshëm gjatë pjesës së parë, por reagoi në fillimin e pjesës së dytë. Në minutën e 45-të të fraksionit të dytë, skuadra vendase arriti të barazojë shifrat në 1-1 me anë të Sebastiano Espozito, i cili finalizoi një aksion të nisur nga Palestra.
Kur ndeshja dukej se po shkonte drejt një barazimi, ishte kapiteni i Komos, Da Kunja, ai që vendosi fatin e sfidës. Në minutën e 77-të, ai realizoi një gol spektakolar me të majtën nga distanca, duke rikthyer avantazhin për skuadrën e tij.
Rezultati 2-1 mbeti i pandryshuar deri në fund, duke i dhënë Komos tri pikë të rëndësishme që konfirmojnë formën e mirë të ekipit në këtë sezon të futbollit italian. Nga ana tjetër, Kaljari mbetet në kuotën e 30 pikëve në renditje.
Lini një Përgjigje