FLASH
Shkruar nga Pamfleti
Ju ftojmë të ndiqni një bllok lajmesh me zhvillimet kryesore nga kronika e zezë, ku ndër të tjera veçojmë:
Raportimi në Komisionin e Ligjeve solli në vëmendje shqetësimet për korrupsionin në institucione dhe kërkesën për zgjidhjen e mandatit të prokurorëve të posaçëm.
Ndërkohë, në Gjykatën Administrative u shty seanca ndaj Ols Dados për shkak të mungesës së avokatit, ndërsa Erion Veliaj deklaroi se vendimi i Kushtetueses ka evidentuar shkelje serioze në masën e paraburgimit ndaj tij.
Në planin e sigurisë dhe krimit, Policia arrestoi 19 persona pas protestës pranë Kuvendit dhe procedoi 12 të tjerë, ndërsa u raportuan përplasje me efektivët dhe dëme materiale.
Në Shkodër u godit një skemë mashtrimi me call center, me 5 të arrestuar dhe mbi 15 persona nën hetim, ndërsa në Divjakë u sekuestruan 44 kilogramë kanabis në një zonë të mbrojtur, ku po hetohen edhe punonjës shtetërorë.
Në vijim të aksioneve të shtetit, IKMT shembi një beach bar pa leje në Jalë, pa kundërshtime nga pronarët, ndërsa në Lushnje një banesë dykatëshe u përfshi nga zjarri, ku dyshohet se shkaku ka qenë një shkëndijë elektrike.
Në Kosovë, Gjykata Themelore në Prishtinë dënoi me 12 vite burg Ekrem Bajroviç për krime lufte në Istog gjatë viteve 1998–1999, për pjesëmarrje në fushatë represioni ndaj civilëve shqiptarë.
Në arenën ndërkombëtare, ekspertë italianë paralajmërojnë se grupet kriminale shqiptare janë fuqizuar ndjeshëm në Europë, duke u përfshirë në trafikun e kokainës dhe duke zgjeruar rrjetet e tyre përmes korrupsionit, teknologjisë dhe lidhjeve ndërkombëtare.
Ndërkohë, në Monako është identifikuar autorja e dyshuar e një atentati me eksploziv ndaj një oligarku ukrainas, e cila ndodhet ende në arrati.
Në Venezuelë, situata pas dy tërmeteve mbetet dramatike, me mbi 2.500 viktima dhe mijëra të plagosur e të zhdukur, ndërsa operacionet e kërkim-shpëtimit vijojnë.
Lini një Përgjigje