FLASH
Shkruar nga Pamfleti
Një histori tronditëse nga SHBA ka përfunduar me dënim të përjetshëm, pasi Judy Church u shpall fajtore për vrasjen e partnerit të saj prej 10 vitesh, Leroy Fowler.
Sipas dosjes hetimore dhe dëshmive në gjykatë, Church dhe Fowler kishin një marrëdhënie të gjatë, por të tensionuar për shkak të një trekëndëshi dashurie ku përfshihej edhe një grua tjetër, Barbara Randall. Megjithëse e dinte për lidhjen paralele, Church nuk kishte pranuar ndarjen, duke besuar se partneri i saj do ta ndërpriste vetë marrëdhënien tjetër.
Ngjarja fatale ndodhi më 11 nëntor 2022, në ditëlindjen e 55-të të Leroy Fowler. Prokuroria deklaroi se ai kishte konsumuar një pije të kontaminuar me antifriz, substancë që përmban etilen glikol dhe që rezulton shpesh fatale për organizmin njerëzor.
Në telefonatën e saj drejt emergjencës, Church u shpreh: “I dashuri im duhet të ketë gëlltitur diçka dhe nuk mund të qëndrojë. I rrjedh gjak nga hunda dhe më tha të telefonoja ambulancën”, ndërsa më vonë mjekët konstatuan dështim të organeve si pasojë e helmimit.
Familjarët e viktimës ngritën menjëherë dyshime, duke theksuar se ai ishte përfshirë në një lidhje tjetër dhe se Church kishte reaguar me xhelozi. Hetimet zbuluan prova të shumta në banesë, përfshirë shishe të dyshuara me mbetje antifrizi dhe gjurmë ADN-je të saj.
Në gjykatë u prezantuan edhe mesazhe dhe shënime personale ku ajo shkruante: “E urrej të rri vetëm. Të urrej për të gjitha gënjeshtrat. Ti nuk më do; kjo nuk është dashuri.”
Një nga elementët më të rëndë të dosjes ishte zbulimi se ajo kishte filmuar momentet kur Leroy Fowler po përjetonte agoni. Në një nga videot e paraqitura në gjykatë, dëgjohej duke i thënë me ironi: “Po argëtohesh?”, ndërsa ai lutej për ndihmë.
Prokuroria e cilësoi rastin si një “trekëndësh dashurie toksik dhe jofunksional”, duke argumentuar se Church kishte pasur akses të drejtpërdrejtë në substancën helmuese dhe kishte vonuar qëllimisht thirrjen për ndihmë.
Gjykata gjithashtu dëgjoi dëshmi se ajo kishte bërë deklarata kërcënuese në të kaluarën, përfshirë: “Nëse më tradhton ndonjëherë, do ta helmoj”.
Në mars të këtij viti, Judy Church, 67 vjeç, u shpall fajtore për vrasje të shkallës së parë me paramendim dhe mizori ekstreme. Një muaj më vonë, gjykata vendosi dënimin me burgim të përjetshëm pa të drejtë lirimi me kusht, duke mbyllur një nga rastet më tronditëse të viteve të fundit në SHBA.
Lini një Përgjigje