FLASH
Shkruar nga Pamfleti
Peter Sorensen, i dërguari i posaçëm i Bashkimit Evropian për dialogun mes Kosovës dhe Serbisë, ka zhvilluar sot një vizitë në Kosovë. Ai u takua fillimisht me kryeministrin në detyrë Albin Kurti dhe presidenten Vjosa Osmani. Më pas me liderët e opozitës.
Sa i takon takimit me Osmanin, presidentja theksoi rëndësinë e një procesi dialogu të fokusuar në njohjen reciproke. Ajo gjithashtu kritikoi qëndrimet e Serbisë, duke thënë se ata shkelin vazhdimisht marrëveshjet.
“Procesi i dialogut duhet të jetë i përqendruar në njohjen reciproke dhe se suksesi i dialogut varet edhe nga trajtimi barabartë i palëve. Serbia vazhdimisht e ka shkelur Marrëveshjen e Brukselit dhe Aneksin e Ohrit, duke shkelur sovranitetin dhe integritetin territorial të Kosovës, duke kryer akte agresioni, si dhe duke kundërshtuar anëtarësimin e Kosovës në organizata ndërkombëtare. Interpretimi selektiv i marrëveshjeve e dëmton procesin. Zgjedhjet dëshmuan pjekurinë demokratike të shtetit dhe funksionimin e institucioneve në përputhje të plotë me standardet evropiane. Ky është një hap i rëndësishëm drejt rivendosjes së partneritetit të plotë dhe të barabartë ndërmjet Kosovës dhe BE-së. Do të vazhdojmë të punojmë pa vonesa të mëtejshme për avancimin e statusit kandidat të Kosovës”, u shpreh Osmani.
Ndërsa në takimin me Kurtin, sipas zyrës së shtypit të qeverisë, kryeministri theksoi se rezultati zgjedhor ka prodhuar një legjitimitet të ri demokratik, i cili garanton qëndrueshmëri politike, duke forcuar më tej funksionimin e rendit kushtetues të Republikës së Kosovës.
“Ky legjitimitet i lartë, i dalë drejtpërdrejt nga vullneti i qytetarëve, siguron përfaqësim të drejtë, kredibil dhe parimor të Kosovës në dialog. Sa i përket palës tjetër në dialog, Kryeministri vlerësoi se e njëjta gjë nuk mund të thuhet për lidershipin në Serbi”, theksohet në njoftim.
Mes tjerash u bë e ditur se në takim, Kurti shprehu gatishmërinë e Kosovës për normalizim të plotë të marrëdhënieve me Serbinë dhe dialog konstruktiv në Bruksel.
Ai theksoi edhe “rëndësinë thelbësore të tërheqjes së letrës së ish-kryeministres Bërnabiq, të deponuar në Shërbimin Evropian për Veprim të Jashtëm (EEAS), dorëzimit të kryeterroristit Millan Radoiçiç, për të cilin tashmë ka aktakuzë 160 faqëshe nga Prokuroria e Republikës së Kosovës, dhe nënshkrimit të Marrëveshjes Bazike dhe Aneksit të Zbatimit si garanci juridike dhe mirëbesim për rrugën përpara. Ai nënvizoi se me zbatimin e plotë të Marrëveshjes Bazike të Brukselit dhe Aneksit të Zbatimit të Ohrit, dialogu prodhon rezultate të qëndrueshme”.
Lini një Përgjigje