FLASH
Shkruar nga Pamfleti
Disa persona janë shoqëruar në polici gjatë ceremonisë së Vidovdanit në Gazimestan, pranë Prishtinës, pasi brohoritën "Kosova është Serbi" dhe kënduan këngë kushtuar Kosovës dhe Vidovdanit.
Ceremonia, e cila organizohet çdo 28 qershor për të përkujtuar Betejën e Kosovës të vitit 1389, u zhvillua nën masa të shtuara sigurie dhe me prani të madhe të Policisë së Kosovës. Në hyrje të kompleksit memorial, efektivët u shpërndanë pjesëmarrësve një njoftim ku paralajmërohej se nuk do të toleroheshin simbole apo veprime që nxisin urrejtje ndëretnike, fetare ose politike.
Pas shoqërimit të disa pjesëmarrësve, reagoi Lista Serbe, e cila pretendoi se personave të ndaluar nuk u është paraqitur asnjë dokument me shkrim që të shpjegonte arsyet e shoqërimit. Në deklaratën e saj, partia e cilësoi veprimin si një përpjekje për frikësim dhe bëri të ditur se ka njoftuar përfaqësuesit ndërkombëtarë, duke kërkuar ndërhyrjen e tyre për lirimin e të shoqëruarve.
Deri në publikimin e këtij lajmi, autoritetet e Kosovës nuk kanë komentuar zyrtarisht mbi ngjarjen.
Shënimi i Vidovdanit në Gazimestan është shoqëruar edhe në vitet e kaluara me tensione. Edhe në vitin 2025, Policia e Kosovës shoqëroi disa persona për marrje në pyetje nën dyshimet për nxitje të urrejtjes dhe përdorim të simboleve apo veshjeve provokuese.
Lini një Përgjigje