FLASH
Shkruar nga Pamfleti
Qytetarët e Rrogozhinës i janë drejtuar sërish këtë të diel kutive të votimit për të rizgjedhur kryetarin e Bashkisë.
33 mijë qytetarë do t’u drejtohen qendrave të votimit nga ora 07:00 deri në 19:00 të mbrëmjes.
Deri tani pjesëmarrja e raportuar nga Komisioni Qendror i Zgjedhjeve është 24%.
Deri tani është shënuar vetëm një incident që ka të bëjë me fotografimin e votës nga një qytetar, ku është mbajtur një proces verbal. Vetëm pak momente më parë, si pasojë e temperaturave të larta, një operatori i ka rënë gjendje të fikti dhe është dërguar në spital.
Komisioni Qendror i Zgjedhjeve u tërhoqi vëmendjen e përfaqësuesve politikë dhe kandidatëve që të respektojnë heshtjen zgjedhore dhe solemnitetin e ditës së votimit.
“Sot është dita e qytetarëve që kanë të drejtën e zgjedhjes dhe deklaratat politike cënojnë standardet e procesit zgjedhor dhe janë në shkelje të dispozitave të Kodit Zgjedhor.”
Gjithashtu, KQZ tërheq vëmendjen e Komisioneve të Qendrave të Votimit që të respektojnë Kodin Zgjedhor dhe të mos lejojnë persona të paautorizuar në Qendrat e Votimit.
Në QV dhe rreth tyre lejohen vetëm zgjedhësit, vëzhguesit e akredituar dhe stafi teknik i KQZ.
Ndërsa për mediat kandidati i “Bashkë Fitojmë”, Shkëlqim Hoxha ka bërë të ditur për mediat se ka grupe që po intimidojnë dhe kërcënojnë njerëzit.
Ai shtoi se garën nuk e ka me Memollën por me kreun e bashkisë së Tiranës Erion Veliaj.
“Ka grupe që kërcënojnë njerëzit, intimidojnë njerëzit, ka në çdo qendër votimi. Me Edisonin i kemi mbyll hesapet, kundërshtar kemi Erionin. Garën e kemi me Erion Veliajn, edhe atë do ta mposhtim. Rrogozhina e ka ndarë mendjen, e ka bërë zgjedhjen. Njësoj si Kavaja do të jetë edhe Rrogozhina”- u shpreh ai për mediat.
Pse u përsëritën zgjedhjet në Rrogozhinë?
Vendimi për përsëritjen e zgjedhjeve u mor pas padisë së koalicionit opozitar “Bashkë Fitojmë”, që kontestonte rezultatin përfundimtar të këtyre zgjedhjeve dhe vendimin e KAS për njohjen e tyre.
Koalicioni opozitar dhe kandidati Shkëlqim Hoxha, kontestuan një kuti votimi në Burgun e Rrogozhinës, e cila përmbysi rezultatin në favor të kandidatit të PS-së Edison Memolla. Në kutinë e burgut, e cila u numërua e fundit, nga 92 vota, 80 ishin në favor të Memollës. Në zgjedhjet e 14 majit, në Rrogozhinë morën pjesë në votime rreth 11 mijë votues.
Edison Memolla i Partisë Socialiste fitoi në zgjedhjet lokale të 14 majit me 5129 vota përkundrejt 5108 vota të Shkëlqim Hoxhës të ‘Bashkë Fitojmë’, me vetëm 21 vota diferencë.
Lini një Përgjigje