FLASH
Shkruar nga Beth Bailey
Rrjeti amerikan “Fox News” ka publikuar online një artikull për zgjedhjet e 11 majit, ku i jep goditje të forta Edi Ramës...
Një ish-ambasador i Shqipërisë në SHBA thotë se zgjedhjet e ardhshme të vendit do të jenë më shumë një përballje mes mbështetësve të Presidentit Trump dhe atyre të George dhe Alex Soros.
"Shqipëria tani është realisht një sistem njëpartiak që pretendon të mbajë zgjedhje", tha për 'Fox News Digital' Agim Nesho, ish-ambasador i Shqipërisë në Shtetet e Bashkuara dhe Kombet e Bashkuara. Nesho tha se beteja e Majit "është një përplasje mes 'Trump-istëve' dhe 'Soros-istëve', me këta të fundit që luftojnë për të mbajtur kontrollin e tyre mbi korrupsionin dhe shtetin në Shqipëri.
Mes akuzave për korrupsion dhe arrestimeve të fundit në radhët e politikës shqiptarë, disa kritikë po shprehin shqetësimin për integritetin e zgjedhjeve të ardhshme për Parlamentin 140 anëtarësh të vendit, të planifikuara tashmë për 11 maj.
Nesho pohoi se socialistët në pushtet "të udhëhequr nga kryeministri Edi Rama, janë jodemokratikë dhe të rrënjosur thellë në afera. Sipas tij, reforma në drejtësi është mbështetur nga donatorë të pasur të majtë si Alex Soros, miku i ngushtë i Ramës dhe nga projekte si USAID dhe Shoqëria e Hapur. Ai shprehet se Rama po e përdor reformën kundër opozitës. Ai pretendoi se kryeministri "mbikëqyr gjithashtu një narko-shtet të fuqishëm që përhap frikë dhe ushtron kontrolle mbi zgjedhjet".
Ish-menaxheri i fushatës së Presidentit Trump, Chris LaCivita, iu bashkua fushatës së Sali Berishës, kreut të Partisë Demokratike të krahut të djathtë të Shqipërisë në shkurt, sipas Politico. LaCivita i tha medias në fjalë se Berisha do të ishte "një mik i vërtetë i Shteteve të Bashkuara dhe... do të punojë me sukses me Presidentin Trump dhe Shtetet e Bashkuara". Ai e quajti Ramën një “kukull të George Soros”.
Berisha, ish-president dhe kryeministër i Shqipërisë, i tha Fox News Digital se qeveria e Ramës "e ndaloi emrin tim dhe emrin e partisë në listën e votimit" gjatë zgjedhjeve të majit 2023.
Parlamenti i hoqi imunitetin Berishës në dhjetor 2023 dhe e vendosi në arrest shtëpie me akuzën se kishte përdorur pozicionin e tij për të ndihmuar dhëndrin e tij të fitonte tokë private. Berisha thotë se "dokumentet zyrtare vërtetonin" se toka i përkiste gjyshit të dhëndrit të tij dhe se ishte konfiskuar nga ish-regjimi komunist.
Nëntorin e kaluar Berisha u lirua nga arresti shtëpiak. Ai u akuzua zyrtarisht për korrupsion në shtator, raportoi Associated Press.
Zëdhënësi i Berishës, Alfred Lela i tha Fox News Digital se Berisha tani është në pritje të gjykimit.
Përveç Berishës, kreu i Partisë së Lirisë dhe ish-presidenti shqiptar Ilir Meta u arrestua me akuza për korrupsion në tetor 2024, në atë që një burim i tha Fox News Digital ishte një "armë e gjyqësorit dhe agjencive të zbatimit të ligjit". Dikur aleat i Ramës, Meta ka vënë në dukje shpesh korrupsionin dhe autoritarizmin në rritje të qeverisë Rama.
Fondacioni Shoqëria e Hapur e George Soros ka investuar më shumë se 131 milionë dollarë në Shqipëri midis viteve 1992 dhe 2020, duke "mbështetur efektivisht ngritjen e zotit Rama në pushtet", raportoi Qendra Evropiane për Ligjin dhe Drejtësinë në vitin 2023. Qendra pretendon se OJF-ja dha 60 milionë dollarë për reformën gjyqësore të USAID-it në Shqipëri. Opozita e ka “denoncuar këtë reformë si lëvizje për të marrë kontrollin e drejtësisë”.
Zyrat e OJF-së në Shqipëri dhe SHBA nuk iu përgjigjën pyetjeve të shumta nga Fox News Digital në lidhje me akuzat e ngritura nga kundërshtarët e saj kundër saj.
Sipas faqes në internet të fondacionit, grupi ka "caktuar 600,000 dollarë për të mbështetur procesin e rinovimit të sistemit gjyqësor të Shqipërisë" në vitin 2015, si pjesë e përgatitjeve të Shqipërisë për t'u bashkuar me Bashkimin Evropian. OSF pretendon se "paratë u përdorën për të financuar një panel ekspertësh prej 20 personash, për të kryer anketa publike dhe opinione, për të krijuar një faqe interneti të dedikuar dhe për të organizuar konferenca."
NewsNation raportoi se Alex Soros udhëton shpesh në Tiranë dhe e quan atë "shtëpinë e tij të dytë". Në korrik 2021, Soros postoi një selfie me Ramën në Instagram, duke e identifikuar kryeministrin si “mikun e tij të mirë”.
Berisha thotë se ai kërkoi tetë vjet më parë që Kongresi i SHBA dhe Parlamenti Evropian "të ndalojnë veprimtarinë politike të [George] Soros në Evropë sepse ai është armik i demokracisë".
Në një fjalim në dhjetor, Berisha tha se do të largonte Soros nga Shqipëria, duke e quajtur grupin një "kërcënim real kombëtar", sipas Euronews Albania. Berisha tha se keqmenaxhimi i burimeve nga qeveria Rama dhe dështimi për të zbutur varfërinë kanë detyruar emigrimin e 45% të shqiptarëve.
Një tjetër pengesë për drejtimin e Berishës janë sanksionet që ish-sekretari i shtetit Antony Blinken shpalli kundër tij, gruas dhe fëmijëve të tij në maj 2021. Blinken tha se Berisha ishte "përfshirë në akte korruptive, të tilla si shpërdorimi i fondeve publike dhe ndërhyrja në proceset publike, duke përfshirë përdorimin e pushtetit të tij për të mirën e tij dhe për të pasuruar aleatët dhe anëtarët e familjes së tij”.
Berisha pretendoi se sanksionet ndaj tij ishin "të bazuara tërësisht në lobimet" e George Soros dhe Ramës. Ai tha gjithashtu se anëtarët e administratës së Biden "e kthyen Ambasadën e SHBA në Tiranë në një zyrë të madhe prokurorie", duke u kërkuar mbështetësve, gazetarëve dhe njerëzve të biznesit të ndalonin mbështetjen ndaj Berishës dhe partisë së tij dhe se Departamenti i Shtetit "u kërkoi vendeve të tjera të më sanksiononin dhe të izolonin mua".
Berisha tha se sanksionet e kanë penguar fushatën e tij. “Sigurisht që më dhemb, sepse nuk jam në gjendje të takohem me shqiptarët e Amerikës, të cilët janë kaq të shumtë dhe në këto zgjedhje, për herë të parë kanë të drejtë të votojnë partinë dhe kandidatin që preferojnë në vendin e origjinës”.
Një zëdhënës i ish-presidentit Joe Biden nuk iu përgjigj pyetjeve nëse administrata e tij kishte një rol në kthimin e mbështetësve kundër Berishës.
Fox News Digital iu drejtua disa herë kryeministrit shqiptar Rama, Fondacionit Soros, Ministrisë së Jashtme shqiptare dhe Ambasadës Shqiptare në Uashington, DC, për komente në lidhje me akuzat për korrupsion dhe ndërhyrje në zgjedhje, por nuk mori asnjë përgjigje. /Përshtati “Pamfleti” nga “Fox News”
Lini një Përgjigje