FLASH
Shkruar nga Pamfleti
Një përballje e përkeqësuar përtej Atlantikut mund të sjellë telashe për vendin kandidat...
Një përplasje në rritje midis Brukselit dhe Uashingtonit kërcënon të errësojë përpjekjet e Shqipërisë për t'u bashkuar me Bashkimin Evropian, ndërsa ajo përballet me një zgjedhje kritike.
Mesazhet publike dhe private nga aleatët e presidentit amerikan Donald Trump për trajektoren e ardhshme të vendit dhe planet e tij për të zbatuar reformat kryesore ekonomike si pjesë e aplikimit për anëtarësim në BE të paraqitur në vitin 2009, janë shkak për shqetësim, sipas dy zyrtarëve të BE-së, që kanë folur duke ruajtur anonimitetin.
Kryeministri socialist Edi Rama, i cili ka qeverisur Shqipërinë që nga viti 2013, e ka bërë anëtarësimin e Shqipërisë në BE deri në vitin 2030 një pjesë kyçe të fushatës së tij, përpara zgjedhjeve parlamentare të 11 majit.
Politikani i qendrës së majtë ka zbuluar madje një pasaportë shqiptare të BE-së dhe ka premtuar se qytetarët do të kenë të drejtë të udhëtojnë, studiojnë dhe punojnë në të gjithë kontinentin.
Ndërkohë, Partia Demokratike e Shqipërisë, grupi më i madh opozitar që qëndron kundër qeverisë së Ramës, ka angazhuar ish-menaxherin e fushatës së Trumpit, Chris LaCivita në shkurt për të udhëhequr strategjinë e saj politike. PD ka udhëhequr protestat duke pretenduar se votimi nuk do të ishte as i lirë dhe as i drejtë për shkak të ndikimit të Ramës në institucionet e vendit, ndërsa platforma TikTok është ndaluar nga qeveria përpara zgjedhjeve.
LaCivita i tha Politico-s muajin e kaluar se evropianët ishin "budallenj" dhe akuzoi Ramën se ishte "kukull e George Soros".
Sipas LaCivita, kreu i Partisë Demokratike Sali Berisha "është një mik i vërtetë i Shteteve të Bashkuara dhe që do të punojë me sukses me Presidentin Trump dhe Shtetet e Bashkuara", ndërsa politikat e Ramës kanë nënkuptuar "Shqipëria po humbet më të mirën. Të rinjtë dhe profesionistët po largohen".
Por, i pyetur nga Politico nëse administrata amerikane po i bënte presion të panevojshëm Shqipërisë për të ndryshuar kursin e saj pro-evropian, Rama përmes një sms përgjigjet se hipoteza ishte “lajm i rremë”.
Problemet transatlantike
Si pjesë e procesit të anëtarësimit në BE, kombit ballkanik do t'i duhet të harmonizojë rregullat e tij ekonomike me Brukselin - ashtu si Uashingtoni përforcon luftën e tij tregtare me bllokun.
Nancy VanHorn, e ngarkuar me punë në Ambasadën Amerikane në Shqipëri, javën e kaluar priti një takim me përfaqësues të Dhomës Amerikane të Tregtisë dhe "diskutuan se si një klimë më e favorshme investimi mund të tërheqë një prani më të madhe të SHBA-së në ekonominë lokale", sipas një njoftimi zyrtar.
Një zëdhënës i Komisionit Evropian këmbënguli se si vendi kandidat, Shqipëria tashmë ka akses në mundësitë "lulëzuese" të investimeve.
"Vendet kandidate duan të anëtarësohen në Bashkimin Evropian sepse e shohin atë si mënyrën më të rëndësishme dhe më të besueshme për të siguruar paqen, stabilitetin dhe prosperitetin e tyre afatgjatë. Në fund të fundit, i takon secilit vend të vendosë për të ardhmen e tij dhe në cilën rrugë dëshiron të marrë," tha zyrtari.
Reformat kryesore si pjesë e procesit të pranimit në BE "kontribuojnë gjithashtu në krijimin e një sistemi ekonomik dhe ligjor të qëndrueshëm dhe të parashikueshëm që është i favorshëm për tërheqjen e investimeve të huaja," shtoi zëdhënësi.
Kryediplomatja e BE-së, Kaja Kallas, zhvilloi bisedime me Ramën në fillim të këtij muaji në Tiranë. "Është jetike të mbash ritmin e lartë të reformave. Unë e kuptoj se reformat janë gjithmonë mjaft të vështira", tha ajo duke shtuar se e ardhmja e Shqipërisë është në Bashkimin Europian”.
Sipas Ivana Stradner, një eksperte për ndërhyrjet e huaja në Ballkan dhe hulumtuese në Fondacionin për Mbrojtjen e Demokracive, nuk do të ishte befasuese që disa me lidhje me Shtëpinë e Bardhë kishin kërkuar të paralajmëronin vendet anëtare të mundshme për t'u bashkuar me BE-në, duke qenë se Presidenti Trump ka pretenduar se blloku ekziston "për të prishur Shtetet e Bashkuara" në tregti.
Megjithatë, shtoi ajo, administrata do të ishte më mirë "të mbështeste plotësisht pranimin e Shqipërisë në BE pasi do të kontribuonte në sundimin e ligjit në vend dhe do të mbronte investimet dhe bizneset e SHBA në Evropën Juglindore".
Kreshnik Çollaku, deputet i Partisë Demokratike, i cili shërben në Komisionin Parlamentar Shqiptar për Çështjet e Jashtme dhe Evropiane, këmbënguli se vendimi për të angazhuar ish-menaxherin e fushatës së Trump tregon vetëm se "marrëdhëniet tona me SHBA-në janë normalizuar dhe forcuar".
Ai mohoi se ndonjë "figurë përkatëse" nga partia e tij të kishte zhvilluar bisedime me Uashingtonin rreth largimit nga bisedimet e pranimit.
"Nuk mund të vendosësh një çmim për integrimin e Shqipërisë në BE. Anëtarësimi ka qenë një aspiratë e fortë 34-vjeçare për vendin dhe është e lidhur thelbësisht me identitetin tonë," shtoi ai. /Përshtati Pamfleti nga Politico/
Lini një Përgjigje