FLASH
Shkruar nga Pamfleti
Kryebashkiaku i Kavajës Fisnik Qosja, i pranishëm në takimin e qeverisë dhe kryetarëve të bashkive në Shkodër, tha se sot duhen lënë pas ndasitë politike.
Në një deklaratë për mediat, Qosja tha se ministrat, zv ministrat dhe kryebashkiakët e pranishëm në Shkodër i bashkon interesi qytetar. Ai shtoi se bashkitë në vend janë në gjendje jo të mirë financiare dhe në këtë mbledhje u fol pikërisht për këtë, sesi mund të përmirësohet situata.
“Nuk jam vetëm unë kryebashkiak i djathtë në Shkodër, por jemi 6. Të lëmë pas ndasitë politike, të shohim interesat e qytetarëve. Ne kishim kërkesat tona, sipas zonave që kemi nën administrim. Të gjitha bashkitë janë në vështirësi ekonomike por besoj se duke bashkëpunuar, do ia dalim”, u shpreh Qosja.
Ndërsa, kryebashkiaku i Fushë Arrëzit, Hil Curri tha se asnjë nuk e ka parë takimin në aspektin politik, pasi sipas tij problematikat e qytetarëve janë më të rëndësishme.
Ai u shpreh se gjatë mbledhjes kanë marrë një garanci duke qenë se vendi është në rrugën e integrimit drejt BE, teksa theksoi se nëse ata do të ndihen të pa respektuar do të ankohen te kancelaritë evropiane.
Curri tha gjithashtu se gjatë takimit u vendos që një herë në muaj kryebashkiakët të kenë një komunikim me ministrat përmes platformës Skype për të thelluar bashkëpunimin.
I pyetur për porosinë e kryeministrit mbi shpërblimet që do kenë bashkitë me performancën më të mirë, tha se një rezultat i tillë mund të arrihet nga bashkitë e mëdha dhe jo të voglat.
“Performancën më të mirë do ta ketë një bashki e madhe. Nëse shpërndarja do jetë ndryshe me anë të riskut që ka një bashki, do të ndryshojë treguesi i performancës. Ka bashki që kanë teprica në buxheti, kurse ne jemi me mungesa", tha Curri.
Lini një Përgjigje