FLASH
Shkruar nga Pamfleti
Ministri i Infrastrukturës dhe Energjisë, Enea Karakaçi, ka ndërhyrë për të zhbllokuar situatën e krijuar në Aeroportin e Vlorës, pas konfliktit mes kompanive “2A Group” dhe “Mabco” që ka çuar në ndërprerjen e punimeve.
Ministri i Infrastrukturës dhe Energjisë, Enea Karakaçi, ka reaguar për të zhbllokuar situatën e krijuar në kantierin e Aeroportit të Vlorës, pas konfliktit mes kompanive “2A Group” dhe “Mabco”, që ka çuar në ndërprerjen e punimeve dhe përfundimin e çështjes në gjykatë.
Përmes një shkrese zyrtare drejtuar dy kompanive, ministria u ka lënë palëve një afat prej 30 ditësh për të gjetur një zgjidhje që do të mundësojë vijimin normal të punimeve dhe përfundimin e projektit brenda afateve të përcaktuara. Në dokument theksohet se zgjidhja e mosmarrëveshjeve nuk duhet të cenojë ecurinë e një prej projekteve më të rëndësishme infrastrukturore në vend.
Reagimi i ministrisë vjen në një kohë kur mosmarrëveshjet mes kompanive kanë sjellë pezullimin e punimeve në aeroport, duke krijuar paqartësi mbi respektimin e afateve të ndërtimit.
Burime zyrtare bëjnë me dije se prioritet mbetet rikthimi i aktivitetit në kantier dhe shmangia e çdo vonese të mëtejshme që mund të ndikojë në realizimin e projektit.
Ministria ka paralajmëruar se nëse brenda 30 ditëve nuk arrihet një zgjidhje mes palëve, do të zbatohen penalitetet e parashikuara në kontratë dhe në legjislacionin në fuqi.
Lini një Përgjigje