FLASH
Shkruar nga Pamfleti
Komisioni Qëndror i Zgjedhjeve i ka dhënë mandatin mesditën e sotme Arkend Ballës, pas dorëheqjes së Rrahman Rrajes. Ky i fundit dorëzoi në Kuvend dorëheqjen nga mandati i deputetit. Në bazë të verifikimit në listën e PS në Komisionin Qendror të Zgjedhjeve, mandatin e lënë nga Rrahman Rrahja i takonte ta merrte Arkend Balla.
“Vendosim dhënien e mandatit deputetit të Kuvendit të Shqipërisë, kandidatit të radhës nga lista shumëemërore e PS-së për zonën zgjedhore Qarku Durrës, zoti Arkend Balla”, u shpreh Komisioneri shtetëror i zgjedhjeve, Ilirjan Celibashi.
Rraja bëri të ditur ditën e shtunë (8 korrik) se do hiqte dorë nga mandati, pasi ndihej i turpëruar nga pamjet e publikuara, e madje i bëri thirrje djalit të tij të dorëzohej në polici.
Rraja u tërhoq nga politika pas dhunës që përdori djali dhe pjesëtarë të tjerë të fisit të tij, ndaj dy kushërinjve Bilbil dhe Jashar Maja. Dhuna ndaj dy kushërinjve Maja u krye pas denoncimit të tyre për shpërthimet në gurore.
Arkend Balla ishte i 12-ti në listën e Partisë Socialiste në qarkun e Durrësit dhe mblodhi 2463 vota në zgjedhjet e vitit 2021.
Lini një Përgjigje