FLASH
Shkruar nga Pamfleti
Protesta e 15-të radhazi para Kryeministrisë është shoqëruar me fjalime dhe mesazhe të forta nga pjesëmarrësit, ndërsa mes atyre që morën fjalën ishte edhe gazetari Osman Stafa.
Duke folur para protestuesve, Stafa theksoi se ishte i pranishëm jo në cilësinë e gazetarit, por si qytetar, duke e cilësuar lëvizjen qytetare si një moment të rëndësishëm për shoqërinë shqiptare.
“Jam nga ju, jo si gazetar. Për 15 ditë në Tiranë, në Shqipëri dhe në diasporë u bë histori. Shqiptarët u ngritën pas 35 vitesh për Shqipërinë dhe dinjitetin, kundër korrupsionit. Jemi në anën e duhur të historisë dhe historinë po e bëjmë ne”, deklaroi ai.
Në fjalën e tij, Stafa u ndal te problematikat që sipas tij kanë nxitur qytetarët të dalin në protestë, duke përmendur korrupsionin, shpopullimin, gjendjen në shëndetësi dhe arsim, si dhe mungesën e perspektivës për të rinjtë.
Ai kritikoi kryeministrin Edi Rama, duke thënë se nuk ka adresuar shqetësimet kryesore të qytetarëve që prej nisjes së protestave.
“Po protestojmë kundër korrupsionit e shpopullimit, për shëndetësinë dhe arsimin. Vetëm një njeri nuk e di pse ne jemi këtu, dhe ai është kryeministri Edi Rama. Ai nuk ka folur asnjë fjalë për çmimet, korrupsionin, arsimin apo të ardhmen tonë”, u shpreh Stafa.
Sipas tij, qytetarët nuk duhet të heqin dorë nga protestat, pavarësisht pritshmërive se lëvizja mund të humbasë vrullin me kalimin e kohës.
“Po presin që ne të lodhemi. Po si të lodhemi ne, kur ata nuk lodhen së vjedhuri dhe abuzuari, duke na vjedhur shpresën dhe të ardhmen? Agjenda jonë është Shqipëria, e tyre është vjedhja”, tha ai.
Në fund të fjalës së tij, Stafa u bëri thirrje qytetarëve të qëndrojnë të bashkuar dhe të mos lejojnë shuarjen e protestës, duke e cilësuar atë si një mundësi të rrallë për të kërkuar ndryshim.
“Të bëhemi bashkë për të ardhmen. Mos ta lëmë të shuhet, sepse kjo nuk përsëritet më”, përfundoi ai mes duartrokitjeve të protestuesve.
Protesta qytetare për dorëheqjen e kryeministrit Rama dhe largimin e qeverisë ka hyrë në ditën e 15-të radhazi, me mijëra qytetarë që u mblodhën sërish këtë të diel para godinës së Kryeministrisë në Tiranë.
Ashtu si në ditët e mëparshme, protestuesit kërkuan largimin e qeverisë dhe zhvillimin e ndryshimeve politike, ndërsa marshuan në rrugët kryesore të kryeqytetit.
Tubimi tërhoqi vëmendjen edhe të turistëve të huaj që ndodheshin në Tiranë. Disa prej tyre u afruan pranë protestës për të ndjekur nga afër zhvillimet, ndërsa të tjerë u bashkuan me qytetarët e mbledhur para Kryeministrisë.
Prania e turistëve në protestë u interpretua nga organizatorët si një tregues se tubimet e përditshme nuk po ndikojnë negativisht në fluksin e vizitorëve të huaj në kryeqytet.
Protestuesit pretendojnë se pjesëmarrja e turistëve në aktivitetet publike dhe interesimi i tyre për protestën bien ndesh me deklaratat e Kryeministrit Edi Rama, i cili ka argumentuar se manifestimet e vazhdueshme mund të ndikojnë në rezervimet dhe aktivitetin turistik.
Ndërkohë, protesta vijon për të 15-ën ditë radhazi, me organizatorët që kanë paralajmëruar vazhdimin e tubimeve deri në realizimin e kërkesave të tyre.
Protesta e 15-të radhazi para Kryeministrisë është shoqëruar me deklarata të forta nga pjesëmarrësit, të cilët kanë vijuar thirrjet për largimin e kryeministrit Edi Rama dhe ndryshime në qeverisjen e vendit.
Një prej protestuesve, duke folur para turmës, deklaroi se mobilizimi i qytetarëve gjatë dy javëve të fundit ka sjellë një reagim më të madh institucional dhe ka rikthyer në vëmendje kërkesat e qytetarëve.
“E bëmë këtë qeveri të flasë me vete e t’i dalë nami në botën mbarë. Sot është dita e 15-të ku shqiptarët janë bërë bashkë kundër të keqes. Bashkimi ynë bëri që SPAK dhe drejtësia të zgjohen”, u shpreh ai.
Protestuesi theksoi se pjesëmarrja në tubime është rritur ndjeshëm krahasuar me ditët e para të protestës, duke e cilësuar këtë si dëshmi të mbështetjes në rritje për lëvizjen qytetare.
“U mblodhën shqiptarët pas 35 vitesh të tregojnë që janë mbesa e nipa të Skënderbeut. Nisëm me 2 mijë, dje ishim 200 mijë në shesh”, deklaroi ai.
Në fund të fjalës së tij, protestuesi i dërgoi një mesazh të drejtpërdrejtë kryeministrit Edi Rama, duke iu referuar deklaratave të fundit të kreut të qeverisë dhe debatit mbi pjesëmarrjen në protesta.
“Meqë ke nisur monologun, kryeministër, kam një mesazh: Turistët i ke midis nesh, ty të kanë ikur patronazhistët”, tha ai mes brohoritjeve të protestuesve.
Vendimi i deputetes së Qarkut të Shkodrës, Marjana Koçeku, e njohur si “Neomalsorja”, për t’u larguar nga grupi parlamentar socialist është pritur me duartrokitje dhe ovacione nga protestuesit e mbledhur në qendër të Tiranës.
Gjatë protestës, një prej organizatorëve iu referua vendimit të deputetes, duke e vlerësuar atë si një hap të rëndësishëm dhe i bëri thirrje që t’i bashkohet lëvizjes qytetare në shesh.
“Duhet të rrimë në shesh, ata do të bien si gurë dominoje. Ne vlerësojmë vendimin e marrë nga deputetja Marjana Koçeku, por themi që kjo është vetëm gjysma e punës. Gjysma tjetër është të vijë në shesh e të këndojë me ne ‘Rama jepe dorëheqjen’. Do të jemi këtu derisa Rama të ngelet vetëm, kur të jetë në qeli”, u shpreh ai.
Reagimi i protestuesve vjen vetëm pak orë pasi Koçeku njoftoi përmes rrjeteve sociale se do të vijojë aktivitetin e saj politik si deputete e pavarur. Në mesazhin e saj, ajo theksoi se vendimi lidhet me idealet dhe vlerat që ka pasur para angazhimit në një forcë politike.
Largimi i “Neomalsorjes” po komentohet gjerësisht në skenën politike, pasi vjen në një moment kur brenda Partisë Socialiste janë shtuar zërat kritikë ndaj drejtimit të partisë dhe mënyrës së qeverisjes. Për protestuesit, ky vendim shihet si një tregues se pakënaqësitë ndaj Edi Ramës nuk po artikulohen vetëm në rrugë, por po shfaqen edhe brenda mazhorancës.
Me pankarta ironike, akuza për korrupsion dhe thirrje për dorëheqje, protestuesit në ditën e 15-të të tubimit para Kryeministrisë shprehën pakënaqësinë ndaj qeverisë dhe gjithë klasës politike në vend.
Protesta qytetare para Kryeministrisë ka hyrë në ditën e saj të 15-të, teksa pjesëmarrësit që kanë vijuar të kërkojnë dorëheqjen e Kryeministrit Edi Rama dhe ndryshim të klasës politike në vend.
Përpara nisjes së marshimit në rrugët kryesore të Tiranës, qytetarët mbajtën fjalime dhe shpalosën pankarta me mesazhe të forta kundër qeverisë dhe figurave kryesore politike të vendit.
Mes pankartave që tërhoqën vëmendjen ishte ajo me sloganin “Rama në burg, Berisha në burg”, ndërsa protestues të tjerë kërkonin përgjegjësi politike dhe ndëshkim për korrupsionin. Në një tjetër pankartë shkruhej: “Populli kërkon drejtësi, jo pandëshkueshmëri”, ndërsa një mesazh në anglisht theksonte: “Wherever there is power, greed and money, there is corruption”.
Nuk munguan as pankartat ironike. Njëra prej tyre paraqiste figura politike të montuara me kostume plazhi nën mbishkrimin “Banda”, ndërsa të tjera ngrinin shqetësime për emigracionin, arsimin dhe mungesën e perspektivës për të rinjtë.
Një grup të rinjsh shfaqën pankarta me mesazhin “14 vjeç... në kantier apo në shkollë?”, duke ngritur pyetje mbi të ardhmen e fëmijëve dhe sfidat sociale në vend. Ndërsa një tjetër pankartë shkruante: “Prindërit në punë në universitet, shteti po na çon në aeroport”, duke iu referuar fenomenit të emigracionit.
Gjatë tubimit, protestuesit brohoritën vazhdimisht “Rama ik”, “Rama jepe dorëheqjen”, “Dorëhiqu, por merr edhe Berishën me vete” dhe “Rama n’burg, Berisha n’burg”.
"Burrneshat nuk rrinë n'heshtje kur vendi i vet ka nevojë për zë", ishte një tjetër mesazh i protestuesve.
Pas fjalimeve, qytetarët nisën marshimin tradicional në rrugët kryesore të kryeqytetit, duke vijuar protestën e përditshme që prej dy javësh para godinës së Kryeministrisë.
Në protestën e 15-të para kryeministrisë është regjistruar një incident. Nga podiumi i protestës u lajmërua sa në turmë ka disa persona që në mënyrë të jashtëligjshme po mbledhin karta identiteti dhe firma për një peticion.
Në këtë moment në turmë ka pasur tensione ku të përfshirë kanë qenë disa të rinj të maskuar mirë me kapuçë dhe syze të mëdha.
Pas disa sekondave shtyrje situata është qetësuar dhe qytetarët kanë nisur me thirrjet e tyre për largimin e Ramës dhe Berishës.
Një qytetare ka marrë fjalën në protestën e zhvilluar në Tiranë, duke iu përgjigjur kështu deklaratave të kryeministrit Rama. Ky i fundit, më herët i ka cilësuar protestuesit si “hajvanë” që kërkojnë largimin e tij nga pushteti.
Në fjalën e saj para tubuesve, ajo u shpreh se qytetarët janë mbledhur për të kërkuar përgjegjësi, drejtësi dhe respekt për të drejtat e tyre, duke e cilësuar protestën si një shprehje të vullnetit demokratik.
“Sot jemi qytetarë të bashkuar. Jemi këtu për të ngritur zërin tonë, për të kërkuar përgjegjësi, drejtësi dhe respekt për të drejtat e çdo qytetari. Kur zëri i një njeriu mund të shpërfillet, zëri i një populli nuk mund të injorohet”, deklaroi qytetarja.
Duke iu referuar komenteve të kryeministrit ndaj protestuesve, e reja reagoi me tone të ashpra, duke kërkuar dorëheqjen e tij.
“A e keni dëgjuar kryeministrin që na quajti hajvanë? Kur një kryeministër zgjedh të fyejë qytetarët që protestojnë, në vend që të dëgjojë shqetësimet e tyre, më lejoni t’i them: ‘Hajvan ti ku je? Jepe dorëheqjen sa më parë’”, u shpreh ajo.
Në vijim të fjalës së saj, qytetarja kërkoi largimin nga politika si të kryeministrit Edi Rama, ashtu edhe të kreut të Partisë Demokratike, Sali Berisha.
“Jep dorëheqjen sa më parë dhe merr edhe shokun tënd bashkëudhëtar, Sali Berisha. Rama n’burg, Berisha n’burg”, shtoi ajo mes duartrokitjeve të pjesëmarrësve në protestë.
Sipas saj, ndryshimi mund të vijë vetëm nëse qytetarët refuzojnë të heshtin përballë padrejtësive dhe vazhdojnë të kërkojnë një të ardhme më të mirë për vendin.
"Sot jemi qytetare të bashkuara, jemi këtu për të ngritur zërin tonë, për të kërkuar përgjegjësi, drejtësi dhe respekt për të drejtat e çdo qytetari. Kur zëri i një njeriu mund të shpërfillet, zëri i një populli nuk mund të injorohet.
Kjo protestë është shprehje e vullnetit tonë demokratik, të lirë dhe e besimit se ndryshimi vjen kur qytetarët refuzojnë të heshtin përballë padrejtësisë. Le të qëndrojmë të bashkuar, të vendosur, sepse e ardhmja ndërtohet nga ata që kanë guxim të kërkojnë një vend më të mirë për të gjithë.
A e keni dëgjuar kryeministrin që na quajti hajvanë? Kur një kryeministër zgjedh të fyejë qytetarët që protestojnë, në vend që të dëgjojë shqetësimet e tyre, të cilët sot janë në shesh, meqë na drejtohet kështu, më lejoni t’i them “hajvanit ku je ti dhe jep dorëheqjen”.
Jep dorëheqjen sa më parë dhe merr edhe shokun tënd bashkëudhëtar, Sali Berisha. Rama n’burg, Berisha n’burg", u shpreh protestuesja.
Qytetarët thirrje të forta kundër qeverisë dhe Sali Berishës...
Protesta e 15-të radhazi kundër qeverisë është shoqëruar me thirrje të forta dhe mesazhe politike nga qytetarët e mbledhur në qendër të Tiranës.
Protestuesit u grumbulluan fillimisht në sheshin “Skënderbej”, për të vijuar më pas me marshimin drejt godinës së Kryeministrisë, ku u mbajtën fjalime dhe u artikuluan kërkesat kryesore të lëvizjes.
Gjatë tubimit nuk munguan sloganet kundër kryeministrit Edi Rama dhe klasës politike në përgjithësi. Mes pankartave më të komentuara ishte ajo me mbishkrimin “Rama në burg, Berisha në burg”, e shoqëruar me mesazhin “Populli kërkon drejtësi, jo pandëshkueshmëri”, duke reflektuar pakënaqësinë e një pjese të protestuesve ndaj figurave kryesore të politikës shqiptare. Në një tjetër pankartë në gjuhën angleze shkruhej: “Wherever there is power, greed and money, there is corruption”, një mesazh që lidhte protestën me kritikat ndaj korrupsionit dhe abuzimit me pushtetin.
Nuk munguan as pankartat satirike dhe ironike, përmes të cilave protestuesit përdorën humorin për të përcjellë mesazhe politike.
Një pjesë e protestuesve mbanin pankarta me mesazhe kundër korrupsionit, keqqeverisjes dhe emigrimit masiv të të rinjve, ndërsa të tjerë shprehën pakënaqësinë e tyre ndaj situatës ekonomike dhe mungesës së besimit tek institucionet.
Gjatë protestës foli edhe një nga të rinjtë pjesëmarrës, i cili deklaroi se kërkon dorëheqjen e kryeministrit Edi Rama dhe heqjen e sistemit të patronazhimit. Sipas tij, shumë të rinj ndihen të papërfaqësuar nga politika aktuale dhe shohin nevojën për një ndryshim të thellë në mënyrën e qeverisjes së vendit.
Organizatorët e protestës theksuan se tubimet nuk lidhen vetëm me një kërkesë politike, por përfaqësojnë një reagim më të gjerë qytetar ndaj problematikave që, sipas tyre, janë akumuluar ndër vite.
Ata përmendën korrupsionin, mungesën e meritokracisë, largimin e të rinjve nga Shqipëria dhe mosfunksionimin e institucioneve si disa nga arsyet kryesore që kanë nxitur mobilizimin qytetar.
Në disa momente të protestës, turma brohoriti slogane jo vetëm kundër qeverisë aktuale, por edhe kundër figurave të tjera të politikës shqiptare, duke treguar se pakënaqësia e një pjese të protestuesve shtrihet përtej mazhorancës dhe prek të gjithë klasën politike.
Ndërkohë, forca të shumta policie ishin të pranishme në zonën përreth Kryeministrisë dhe në akset kryesore të kryeqytetit për të garantuar rendin dhe sigurinë gjatë zhvillimit të aktivitetit. Deri në momentin e raportimit, protesta është zhvilluar pa incidente.
Kjo është protesta e 15-të radhazi e organizuar në Tiranë, ndërsa organizatorët kanë paralajmëruar se tubimet do të vijojnë edhe në ditët në vazhdim, duke këmbëngulur se kërkesat e tyre mbeten të pandryshuara: largimi i Edi Ramës, zgjedhje të lira, më shumë transparencë dhe reformim i sistemit politik.
Një protestuese nga diaspora shqiptare mori fjalën në tubimin qytetar sot në Tiranë, duke theksuar rolin e emigrantëve në mbështetjen e familjeve të tyre dhe duke garantuar se diaspora do të vazhdojë të jetë pjesë e protestave.
“Jam sot këtu për të treguar se diaspora nuk është këtu vetëm një ditë, por do të jemi çdo ditë”, deklaroi ajo para Kryeministrisë.
Në fjalën e saj, ajo vuri në dukje kontributin ekonomik që emigrantët japin për familjet në Shqipëri, duke theksuar se mijëra familje mbështeten te të ardhurat e siguruara nga të afërmit që jetojnë dhe punojnë jashtë vendit.
“Le ta themi hapur, diaspora blen ilaçet e shëndetësisë falas për nënat dhe baballarët, paguan ujin dhe dritat. Pa diasporën, mijëra familje nuk do të arrinin të mbijetonin”, u shpreh protestuesja.
Protestuesja e përshkroi emigracionin si një sakrificë të përditshme, duke kujtuar prindërit që jetojnë larg fëmijëve dhe të rinjtë që detyrohen të punojnë në vende të huaja për të ndihmuar familjet e tyre në Shqipëri.
Sipas saj, vendi vazhdon të mbështetet në kontributin e emigrantëve, ndërsa u bëri thirrje qytetarëve dhe diasporës që të vijojnë angazhimin në protestat që po zhvillohen në Tiranë.
Para nisjes së marshimit nga sheshi “Skënderbej”, një prej të rinjve aktivë në organizimin e protestave ka folur për News24, duke shprehur pakënaqësinë e tij ndaj situatës politike në Shqipëri.
26-vjeçari tha se kërkon dorëheqjen e kryeministrit Edi Rama dhe heqjen e sistemit të patronazhistëve, të cilin e konsideron një nga problemet kryesore të vendit.
“Jam një i ri 26 vjeçar, kam mbaruar shkollën para disa vitesh dhe nuk jam i kënaqur me politikën në Shqipëri. Kërkoj dorëheqjen e Edi Ramës dhe të hiqen patronazhistët”, deklaroi ai.
Sipas protestuesit, tubimi do të nisë me fjalime në sheshin “Skënderbej”, për të vijuar më pas me marshimin drejt Kryeministrisë dhe në rrugët e kryeqytetit. Ai shtoi se itinerari përfundimtar i protestës vendoset në kohë reale nga organizatorët dhe pjesëmarrësit në shesh.
Protestat kundër qeverisë kanë hyrë tashmë në ditën e 15-të, ndërsa organizatorët kanë paralajmëruar vijimin e tyre edhe në ditët në vijim.
Dhjetëra shqiptarë të diasporës janë mbledhur në rrugët e Romës, ku kanë zhvilluar një protestë në mbështetje të manifestimeve që po zhvillohen prej ditësh në Shqipëri.
Pamjet e transmetuara nga koordinatori i Partisë Demokratike për Italinë, Bardhok Doda, tregojnë pjesëmarrësit teksa marshojnë dhe shprehin pakënaqësinë e tyre ndaj qeverisë shqiptare.
Gjatë tubimit, protestuesit hodhën akuza të forta ndaj Kryeministrit Edi Rama dhe qeverisë së tij, duke pretenduar se pushteti aktual është i lidhur me krimin dhe se proceset zgjedhore janë deformuar përmes blerjes së votës.
Në fjalimet e mbajtura gjatë protestës, pjesëmarrësit deklaruan se mandatet e fituara nga mazhoranca “u vijnë erë kokainë dhe krim”, ndërsa thirrjet “Rama ik” dhe “Rama jep dorëheqjen” dominuan atmosferën e tubimit.
Përfaqësues të diasporës shqiptare në Itali i bënë gjithashtu thirrje Bashkimit Evropian dhe partnerëve ndërkombëtarë që të mos njohin qeverinë aktuale shqiptare.
Sipas organizatorëve, protesta në Romë synon të shprehë solidaritet me qytetarët që po protestojnë në Tiranë dhe të përcjellë mesazhin se diaspora mbështet kërkesat për ndryshim politik dhe një Shqipëri më demokratike.
Gjatë grumbullimit të protestuesve nuk munguan thirrjet e forta kundër figurave kryesore politike në vend. Mes sloganeve të dëgjuara nga turma ishin “Edi Rama, o legen, prite burgun se po vjen”, “Rama në burg, Berisha në burg” dhe “Revolucion”, duke reflektuar pakënaqësinë e protestuesve jo vetëm ndaj qeverisë aktuale, por edhe ndaj klasës politike në tërësi.
Ka nisur pasditen e kësaj të diele protesta e 15-të radhazi, ku dhjetëra qytetarë janë nisur drejt Kryeministrisë për të vijuar kërkesat e tyre për largimin e kryeministrit Edi Rama dhe ndryshime në qeverisjen e vendit.
Ashtu si në protestat e mëparshme, pjesëmarrësit janë shfaqur me pankarta, flamuj kombëtarë dhe mesazhe kundër qeverisë, ndërsa në zonën përpara Kryeministrisë dëgjohen thirrje që kërkojnë dorëheqjen e kreut të ekzekutivit dhe përgjegjësi më të madhe nga institucionet shtetërore.
Një prej studentëve të angazhuar në organizimin e protestës deklaroi se kërkesat e protestuesve mbeten të pandryshuara: dorëheqja e kryeministrit Edi Rama, zhvillimi i zgjedhjeve të lira dhe heqja e sistemit të patronazhimit. Sipas tij, pas disa fjalimeve në shesh, protestuesit do të marshojnë drejt godinës së qeverisë dhe më pas në rrugët e kryeqytetit, ndërsa itinerari i plotë do të përcaktohet gjatë zhvillimit të tubimit.
“Kërkoj dorëheqjen e Ramës dhe sistemet e patronazhimit që ai ka sjellë. Kërkoj gjithashtu që të ketë zgjedhje të lira në Shqipëri”, u shpreh studenti.
Organizatorët e kanë cilësuar protestën si pjesë të një lëvizjeje qytetare që po fiton mbështetje nga dita në ditë, duke theksuar se pakënaqësitë e qytetarëve nuk lidhen vetëm me një çështje të veçantë, por me problematika të akumuluara ndër vite.
Sipas tyre, korrupsioni, keqqeverisja, mungesa e transparencës, largimi masiv i të rinjve nga vendi dhe rënia e besimit tek institucionet janë disa nga arsyet kryesore që kanë nxitur qytetarët të dalin vazhdimisht në protestë.
Tubimi i sotëm vjen pas dy javësh protestash të pandërprera, të cilat janë zhvilluar kryesisht në mënyrë paqësore. Në secilën prej tyre, protestuesit kanë kërkuar jo vetëm largimin e qeverisë aktuale, por edhe një reformim më të gjerë të sistemit politik në vend.
Ndërkohë, forca të shumta policie janë vendosur në perimetrin e Kryeministrisë dhe në akset kryesore përreth, me qëllim garantimin e rendit dhe sigurisë gjatë zhvillimit të protestës. Deri në momentin e raportimit, nuk janë shënuar incidente.
Gjatë orëve në vijim pritet që përfaqësues të organizatorëve dhe qytetarë të ndryshëm të mbajnë fjalime para protestuesve, ndërsa nuk përjashtohet mundësia e marshimeve në disa nga rrugët kryesore të kryeqytetit.
Protesta e 15-të konfirmon vijimësinë e kësaj lëvizjeje qytetare, e cila prej javësh po mban të fokusuar vëmendjen e opinionit publik, ndërsa organizatorët kanë paralajmëruar se tubimet do të vazhdojnë edhe në ditët në vijim.
Lini një Përgjigje