FLASH
Shkruar nga Pamfleti
Policia e Tiranës ka reaguar pas kontrolleve që janë ushtruar në Kamëz lidhur me vrasjen e postierit, Lulzim Visha.
Pas kontrolleve të ushtruara në banesën e Ervis Lamit, policia ka gjetur dhe sekuestruar një armë zjarri automatike me silenciator, municion luftarak, 15 copë fishekë luftarak, një sopatë, një thikë, një këllëf pistolete glok ndërsa në oborrin e banesës janë gjetur 4 gëzhoja armë.
Ervis Lami, njihet për arratisjen nga burgu i Drenovës. Lami nuk ka qenë në shtëpi në momentin e kontrolleve, por dera është hapur nga një familjar i tij. 31-vjeçari u shpall në kërkim ndërsa policia po punon për kapjen dhe arrestimin e tij.
Në pranga ka rënë djali i xhaxhait të tij, 37-vjeçari Eduart Lami, i akuzuar për veprat penale “Mbajtja pa leje dhe prodhimi i armëve, armëve shpërthyese dhe e municionit” dhe “Prodhimi, mbajtja, blerja apo shitja pa leje e armeve të ftohta”.
"Kontrolle intensive dhe punë profesionale hetimore për zbardhjen e ngjarjes, identifikimin dhe kapjen e autorëve të vrasjes së 48-vjeçarit, mëngjesin e djeshëm në Kamëz. Në kuadër të kontrolleve bazuar në inteligjencën policore, Strukturat hetimore dhe operacionale të DVP Tiranë, në kuadër të operacionit policor të koduar “Silenciatori”, goditën një rast të armëmbajtjes pa leje.
Gjatë kontrollit në banesën e shtetasit Ervis Lami, në rrugën Paqësore, Zall Mner, Kamëz, shërbimet e Policisë gjetën dhe sekuestruan në cilësinë e provës materiale një armë zjarri automatike me silenciator dhe municion luftarak, 15 copë fishekë luftarak, një sopatë, një thikë, një këllëf pistolete glok dhe në oborrin e banesës janë gjetur 4 gëzhoja armë.
Në vijim të veprimeve hetimore u bë arrestimi në flagrancë i shtetasit Eduart Lami, 37 vjeç, banues në Kamëz, për veprat penale “Mbajtja pa leje dhe prodhimi i armëve, armëve shpërthyese dhe e municionit” dhe “Prodhimi, mbajtja, blerja apo shitja pa leje e armeve të ftohta”.
Po në kuadër të operacionit si rezultat i veprimeve hetimore u bë shpallja në kërkim dhe vijon puna për kapjen e shtetasit Ervis Lami, 31 vjeç.
Nga tërësia e veprimeve paraprake hetimore, administrimit të provave dhe fakteve, rezulton se banesa ku janë gjetur sendet e kundraligjshme është në posedim të shtetasit E.L dhe përdoret nga të dy shtetasi Eduart Lami 37 dhe Ervis Lami 31 vjeç.
Arma e zjarrit, gëzhojat si dhe sendet e tjera të sekuestruara në banesë po dërgohen në Institutin e Policisë Shkencore për ekzaminime të mëtejshme për të parë nëse kjo armë zjarri është përdor në ngjarje kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme", njofton policia.
Lini një Përgjigje