FLASH
Shkruar nga Pamfleti
Policia Kombëtare spanjolle ka bërë publike informacione të rëndësishme në lidhje me vrasjen e 31-vjeçarit shqiptar, trupi i të cilit u gjet vjeshtën e kaluar brenda një thesi në zonën moçalore të rezervuarit Casasola, në Almogía (Málaga).
Sipas përfundimeve të hetimit, vrasja dyshohet se është kryer në kuadër të një larjeje hesapesh që lidhet me trafikun ndërkombëtar të drogës. Autoritetet spanjolle theksojnë se viktima ishte joshur në një kurth nga autorët, të cilët e kishin kontaktuar me pretekstin e një takimi për finalizimin e një transaksioni të supozuar, por që në fakt rezultoi fatal për të.
Në kuadër të kësaj çështjeje janë arrestuar tre persona në provincën e Barcelonës, të cilët dyshohet se kanë lidhje me vrasjen dhe janë vendosur në paraburgim me urdhër të autoriteteve gjyqësore.
Të ndaluarit janë dy burra shqiptarë, bashkatdhetarë të viktimës dhe të lidhur me aktivitetin e trafikut të drogës, të cilët konsiderohen si autorët kryesorë të krimit, si dhe një grua spanjolle, e dyshuar si bashkëpunëtore. Kjo e fundit kishte marrë me qira një automjet në emrin e saj dhe ua kishte vënë në dispozicion të dyshuarve për realizimin e krimit.
Gjatë operacionit policor u kryen tre kontrolle në qytetet Vallirana dhe Villafranca del Penedés në Barcelonë, ku u sekuestruan armë zjarri kopje, telefona celularë dhe dokumente që konsiderohen të rëndësishme për hetimin.
Hetimi nisi pas një denoncimi për person të zhdukur, të paraqitur nga partnerja e viktimës, e cila raportoi zhdukjen e tij në rrethana të dyshimta. Çështja u ndoq nga agjentë të Grupit të Krimit të Organizuar të Policisë së Marbellas, në bashkëpunim me UDYCO Costa del Sol dhe Grupin 23 të UDET në Barcelonë.
Me ndihmën e gruas që bëri denoncimin, hetuesit arritën të rindërtojnë momentet e fundit të jetës së 31-vjeçarit. Më 12 maj 2025, ai ndodhej në një restorant në Marbella së bashku me partneren e tij, kur mori një telefonatë nga persona të njohur, të cilët i kërkuan të takohej me ta në një motel në zonën Puerto de la Torre në Málaga. Kjo ishte hera e fundit që ai u pa nga partnerja e tij. Çifti jetonte në Benahavís dhe bënte një jetë luksoze.
Nga hetimet paraprake u konstatua se zhdukja nuk ishte vullnetare. Policia gjeti prova që tregonin se viktima kishte mbërritur në vendtakim dhe kishte hipur në një automjet ku ndodheshin dy persona të tjerë. Më pas, ata u drejtuan për në një zonë malore pranë rezervuarit në Almogía.
Zbulimi i trupit u bë më 14 tetor, kur një person që ndodhej në zonë konstatoi një thes të dyshimtë në rezervuarin Casasola. Brenda tij u gjet trupi i pajetë i një burri, i lidhur me lidhëse plastike dhe në gjendje të avancuar dekompozimi. Në thes u gjetën gjithashtu blloqe çimentoje, të cilat dyshohet se ishin përdorur për të rënduar trupin dhe për ta zhdukur atë në ujë.
Autoritetet besojnë se ulja e nivelit të ujit pas sezonit veror bëri të mundur zbulimin e trupit, duke dështuar përpjekjen e autorëve për të fshehur kufomën dhe për të zhdukur provat.
Identifikimi i viktimës u bë përmes analizave të ADN-së, të kombinuara me elementë të tjerë si rrobat dhe tatuazhet në trup. Autopsia konfirmoi se vdekja ishte rezultat i dhunës.
Në vijim të hetimeve, policia arriti të identifikojë automjetin me të cilin ishte larguar viktima nga vendtakimi. Mjeti rezultoi i marrë me qira nga një grua në Barcelonë dhe kishte lëvizur në zonën ku viktima ishte parë për herë të fundit në ditët para zhdukjes.
Nga kjo gjurmë, autoritetet identifikuan gruan 58-vjeçare dhe më pas dy shtetasit shqiptarë, të moshës 36 dhe 45 vjeç, të cilët kishin udhëtuar nga Barcelona drejt Málaga-s për të kryer krimin. Të tre u arrestuan në muajin shkurt, të dyshuar për vrasje dhe përfshirje në organizatë kriminale.
Gjatë kontrolleve në banesat e tyre në Vallirana u sekuestruan dokumente në emër të gruas së arrestuar, telefona celularë dhe armë zjarri kopje. Një kontroll i tretë u zhvillua edhe në Villafranca del Penedés.
Autoritetet bëjnë me dije gjithashtu se gjatë hetimit, familjarët e viktimës janë përballur me kërcënime, që dyshohet se kanë ardhur nga persona të lidhur me rrjetin kriminal, me qëllim ndalimin e kërkimeve për të zhdukurin.
Lini një Përgjigje