FLASH
Shkruar nga Pamfleti
Një konflikt ka përfunduar me plagosjen e një 40-vjeçari me thikë në fshatin Golem të Lushnjes. Sipas informacioneve paraprake, ngjarja ka ndodhur në ambientet e një lokali, ku pas një debati mes dy banorëve të zonës, një 17-vjeçar ka goditur dy herë me mjet prerës 40-vjeçarin.
Menjëherë pas incidentit, i plagosuri është transportuar me urgjencë në spitalin e Lushnjes për të marrë ndihmën e nevojshme mjekësore. Edhe pse fillimisht gjendja e tij u raportua e rëndë, burime mjekësore bëjnë me dije se pas ndërhyrjes së stafit shëndetësor ai ndodhet jashtë rrezikut për jetën.
Forcat e policisë kanë reaguar menjëherë pas marrjes së njoftimit, duke mbërritur në vendngjarje dhe duke bërë të mundur kapjen e autorit të dyshuar. Gjithashtu, është sekuestruar edhe thika e përdorur gjatë konfliktit, në cilësinë e provës materiale.
Grupi hetimor po vijon veprimet për zbardhjen e plotë të rrethanave dhe motiveve që çuan në përshkallëzimin e konfliktit deri në përdorimin e armës së ftohtë. Hetimet për ngjarjen janë në vazhdim.
Kjo është ngjarja e dytë për sot, pas plagosjes me thikë të një të riu në Korçë për shkak të një konflikti të dyshuar për borxh, duke e çuar në dy numrin e plagosjeve me armë të ftohta brenda pak orësh në vend.
Lini një Përgjigje