FLASH
Shkruar nga Pamfleti
Aktivistja Luçiana Kokaj ka deklaruar nga podiumi i protestës para Kryeministrisë se ishte thirrur në Komisariatin e Policisë për të dhënë sqarime lidhur me marshimin e zhvilluar një natë më parë drejt aeroportit të Rinasit.
Në fjalën e saj para protestuesve, Kokaj sqaroi se është pjesë e grupit që mori iniciativën për nisjen e protestave, por theksoi se organizatorët e vërtetë të tyre janë vetë qytetarët që marrin pjesë çdo ditë në tubime.
“Vij nga Komisariati i Policisë ku isha për të bërë një deklaratë për marshimin e djeshëm ashtu siç e sqarova unë jam pjesë e grupit që kemi marrë iniciativën për protestën ditën e parë, por jo organizatore, organizatorët jeni ju.
Marshimi i djeshëm ishte spontan, nuk ishte i organizuar. Ne respektojmë policinë, do të protestojmë edhe për ata. Çdo ditë do të respektojmë ligjin”, deklaroi ajo.
Aktivistja theksoi se pjesëmarrësit në protesta do të vijojnë të ushtrojnë të drejtën e tyre për tubim, duke respektuar institucionet dhe ligjin. Deklarata e saj erdhi një ditë pasi qindra protestues marshuan për disa orë nga qendra e Tiranës drejt zonës së Rinasit, në një nga lëvizjet më të gjata të kësaj serie protestash.
Fjalimi i Kokajt u prit me duartrokitje nga protestuesit, ndërsa tubimi vijoi me mesazhe të tjera kundër qeverisë dhe thirrje për vazhdimin e protestave.
Lini një Përgjigje