FLASH
Shkruar nga Pamfleti
Dy të rinj janë vënë në pranga ditën e sotme në Mirditë pasi mësohet se ata kanë marrë peng një 19-vjeçar. 20-vjeçari, Mateos Brozi dhe 19-vjeçari, Ergys Tusha pasi morën peng të riun i kanë vjedhur paratë.
Më tej në njoftim bëhet me dije se policia ka sekuestruar 220 000 lekë që të arrestuarit synonin t’i vidhnin 19-vjeçarit, automjetin e përdorur gjatë pengmarrjes dhe 2 celularë.
"Menjëherë pas kallëzimit të një shtetasi 19 vjeç, se ishte marrë me forcë në automjet, nga 2 shtetas të tjerë, të cilët për t’i marrë paratë, e kishin mbajtur për disa minuta, kundër vullnetit të tij, në garazhin e mbyllur të një pallati në Rrëshen, dhe më pas e kishin lënë në rrugë, shërbimet e Komisariatit të Policisë Mirditë organizuan punën për të identifikuar dhe arrestuar përgjegjësit.
Si rezultat, në kuadër të operacionit policor të koduar “Telefonata”, shërbimet e Policisë bënë të mundur identifikimin dhe arrestimin e menjëhershëm të autorëve të dyshuar të rastit, shtetasve M. B., 20 vjeç, banues në Rrëshen dhe E. T., 19 vjeç, banues në Durrës.
Gjithashtu, u bë e mundur gjetja e shumës së parave të vjedhura me dhunë, 220 000 lekë, e cila u sekuestrua bashkë me automjetin tip “Audi A4”, me të cilin u mor me forcë 19-vjeçari, dhe me 2 celularët e të arrestuarve.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme, për veprat penale “Heqja e paligjshme e lirisë” dhe “Vjedhja me dhunë”, të kryera në bashkëpunim."-njofton policia.
Lini një Përgjigje