FLASH
Shkruar nga Pamfleti
Zbardhen të tjera detaje nga plagosja me armë zjarri të një 18-vjeçareje në ambientet e hotel “Gjuta”, në zonën e Saukut, ngjarje e regjistruar rreth mesnatës.
Sipas të dhënave hetimore, e reja Natalia.K dyshohet se është vetëplagosur me një plumb në gjoks. Ajo është transportuar me urgjencë drejt spitalit, ku i është nënshtruar ndërhyrjes kirurgjikale dhe aktualisht ndodhet në gjendje të qëndrueshme shëndetësore.
Në dëshminë e dhënë pas ndërhyrjes mjekësore, 18-vjeçarja ka deklaruar se akti ishte i qëllimshëm, duke u shprehur se kishte “gabime në jetë” dhe se kishte dashur t’i jepte fund jetës. Megjithatë, rrethanat e plota të ngjarjes vijojnë të jenë objekt hetimi.
Në momentin e ngjarjes, në dhomën e hotelit ndodhej edhe 22-vjeçari Erisjaldo Gjuta, i cili rezulton të jetë i dashuri i saj. Ai është shpallur në kërkim nga policia, së bashku me babanë e tij, Sajmir Gjuta, dhe kushëririn, Elvir Gjuta. Ky i fundit dyshohet se ka shoqëruar 18-vjeçaren drejt spitalit bashkë me nënën e 22-vjeçarit.
Ndërkohë, në pranga kanë rënë Mirvete Gjuta dhe xhaxhai i 22-vjeçarit, Vladimir Gjuta. Të gjithë personat e arrestuar dhe ata të shpallur në kërkim akuzohen për veprat penale “Moskallëzim krimi” dhe “Veprime që pengojnë zbulimin e së vërtetës”. Për 22-vjeçarin Erisjaldo Gjuta rëndon gjithashtu edhe akuza e “Armëmbajtjes pa leje”.
Sipas burimeve hetimore, familjarët dyshohet se kanë tentuar të fshehin ngjarjen, me pretendimin se kishin frikë nga pasojat ligjore, pasi tentativa për vetëvrasje ndodhi në ambientet e biznesit të tyre.
Hetimet vijojnë për të sqaruar plotësisht dinamikën e ngjarjes dhe përgjegjësinë e secilit prej personave të përfshirë.
Lini një Përgjigje