FLASH
Shkruar nga Pamfleti
Policia e Shtetit ka zbardhur detaje nga arrestimi në SHBA i Sokol Hoxhës, një shqiptar i kërkuar prej gati tre dekadash për dy ngjarje të rënda kriminale në Shqipëri dhe Belgjikë. Operacioni ndërkombëtar, i koduar “Globi”, u finalizua në shtetin Ohio, falë bashkëpunimit mes autoriteteve shqiptare, agjencive ligjzbatuese amerikane dhe strukturave të Interpolit në disa vende.
Sokol Hoxha, lindur në Fier, rezulton i dënuar në Shqipëri me 25 vite burg për vrasjen e dy vëllezërve në Patos në mars të vitit 1997. Sipas hetimeve, ai dyshohet se kreu krimin në bashkëpunim me një tjetër person, për motive të dobëta.
Vetëm pesë muaj pas kësaj ngjarjeje, Hoxha u përfshi edhe në një tjetër krim të rëndë në Belgjikë. Autoritetet belge e dënuan me burgim të përjetshëm, pasi në vitin 1997 vrau me armë zjarri një shtetase shqiptare në Bruksel, të cilën më herët e kishte shfrytëzuar për prostitucion.
Policia shqiptare njoftoi se po vijon procedurat në bashkëpunim me autoritetet amerikane për ekstradimin e 51-vjeçarit drejt Shqipërisë, ku pritet të përballet me drejtësinë për dënimin e dhënë nga Gjykata e Fierit.
"Operacioni u finalizua si rezultat i bashkëpunimit ndërmjet Shërbimit të Sigurisë Diplomatike të Ambasadës Amerikane në Tiranë, Departamentit të Policisë Kriminale, Interpol Tiranës, Interpol Uashingtonit, Interpol Mançesterit dhe Interpol Brukselit.
Arrestohet në Ohio, SHBA, një shtetas shqiptar, i dënuar në Shqipëri, me 25 vjet burgim, dhe në Belgjikë, me burgim të përjetshëm, për vrasje.
I arrestuari, në muajin mars 1997, vrau 2 vëllezër, në Patos, dhe 5 muaj më pas, vrau në Belgjikë, një shtetase shqiptare, të cilën e kishte shfrytëzuar për prostitucion.
Si rezultat i bashkëpunimit ndërkombëtar policor ndërmjet hetuesve nga Njësia Speciale Policore e Departamentit të Policisë Kriminale (e njohur si “Njesia e përbashkët e shërbimeve investiguese”, e cila punon ngushtë me Njësitë e Hetimeve Ndërkombëtare Kriminale DSS/OCIU në Ambasadën Amerikane në Tiranë), Drejtorisë së Interpolit në Policinë e Shtetit, homologëve të tyre në Uashington, Mançester dhe Bruksel, Marshallëve Amerikanë dhe agjencive të tjera të zbatimit të ligjit në SHBA, në kuadër të operacionit të koduar “Globi", u arrestua në Ohio, shtetasi shqiptar i kërkuar që prej vitit 1997:
-Sokol Hoxha, 51 vjeç, lindur në Fier.
Ky shtetas, në vitin 2000, është dënuar nga Gjykata e Fierit, me 25 vjet burgim, për veprën penale “Vrasja”, kryer në bashkëpunim, pasi më datë 30.03.1997, në Patos, Fier, në bashkëpunim me shtetasin D. S., ka vrarë me armë zjarri, shtetasit H. B. dhe I. B. (vëllezër), për motive të dobëta.
Gjithashtu, në vitin 2010, është dënuar nga Gjykata e Brukselit, Belgjikë, me burgim të përjetshëm, për veprën penale “Vrasja me dashje”, pasi më datë 29.08.1997, ka vrarë me armë zjarri, në Bruksel, një shtetase shqiptare, të cilën më parë e kishte shfrytëzuar për prostitucion.
Policia e Shtetit po punon ngushtë me agjencitë ligjzbatuese të SHBA-së, për ta kthyer 51-vjeçarin për t'u përballur me drejtësinë në Shqipëri", njofton policia.
Lini një Përgjigje