FLASH
Shkruar nga Pamfleti
Rëndohet bilanci i viktimave në Itali, dy shqiptarë të vdekur dhe dy të plagosur...
Zbardhen detaje të reja nga ngjarja e rëndë në Frosinone, ku 2 shqiptarë u vranë dhe 2 të tjerë janë plagosur.
Sipas “Sky Tg24”, ngjarja ndodhi pak para orës 19:30 në lokalin “Shake” në qendrën Via Aldo Moro, në pjesën e poshtme të qytetit. 4 shqiptarët kanë qenë duke qëndruar në lokal dhe në një moment ka ndaluar një makinë tip "Lançia", nga e cila kanë zbritur dy marokenë. Ata janë afruar te shqiptarët dhe kanë pasur një debat mes tyre, që ka degraduar në konfrontim fizik.
Më pas, njëri prej marokenëve ka marrë armën në makinë dhe ka qëlluar ndaj 4 shqiptarëve. Njëri prej tyre ka marrë plumb në kokë, ndërsa 3 të tjerët në këmbë e gjoks. Zona ka qenë mjaft e populluar dhe qytetarët kanë thirrur ambulancën. Edhe pse personeli u mundua ta shpëtonte të riun me plumb në kokë, por ai ndërroi jetë. 3 të tjerët u dërguan në spital. Më pas një tjetër vdiq në sallën e operacionit.
Sipas mediave, viktima e parë është gjetur i shtrirë në trotuar, ndërsa 3 të tjerët kanë tentuar tu shmangen plumbave.
I plagosuri më rëndë u deklarua i vdekur pas të paktën njëzet minutash masazh kardiak të kryer nga mjekët në trotuar. Viktima e parë u identifikua dhe pak pas orës 20:30 mbërritën familjarët teksa policia i shoqëroi në komisariat për të rindërtuar kontekstin në të cilin ndodhi krimi.
Ndërkohë, më pas marokenët janë larguar me vrap, duke braktisur makinën. Policia ka sekuestruar mjetin dhe po verifikon se në pronësi të kujt është.
Kryetari i bashkisë Frosinone Riccardo Mastrangeli, tha se është i shokuar nga krimi dhe se kjo është një ngjarje e pashpjegueshme.
"Jam i shokuar, nuk mund të them asgjë. Për mua kjo që ndodhi është e pashpjegueshme. Është një plagë për të gjithë qytetin. Mund të konfirmoj vetëm se nesër në mëngjes do të flasim me prefektin", tha kryetari i bashkisë Frosinone Riccardo Mastrangeli.
Ai njofton se Prefekti i Frosinone-s Ernesto Liguori do të mbledhë nesër në mëngjes Komitetin për rendin dhe sigurinë publike ku do të bëjë një bilanc të ngjarjes që tronditi vendin. /Pamfleti
Lini një Përgjigje