FLASH
Shkruar nga PamfletiKa vetëm një model të ngjashëm në botë dhe ky vjen nga Turqia. Erdogan ka bërë disa herë manovra të tilla, sa herë nuk ka pasur interes që populli i tij të ketë akses online. Një model të tillë ka edhe Koreja e Veriut apo vende të tjera diktatoriale. A po rrëshqasim edhe ne në këtë vorbull?
Reagimi i TikTok, mbi vendimin e Edi Ramës për ta mbyllur plotësisht këtë platformë për një vit në Shqipëri, ka një të vertetë, të qartë si drita e diellit: vrasja e 14 vjeçarit, Martin Cani nuk ka asnjë lidhje me TikTok. Asnjëherë dhe askush nuk e ka drejtuar gishtin mbi platformën dixhitale, mbi atë që ndodhi. Dhe kjo është e provuar tashmë.
Megjithatë Edi Rama, në takimin e së shtunës, me nxënës, mësues e prindër, e rrotulloi fatkeqësinë e pak ditëve më parë si karamele në gojë. Madje gjatë fjalimit të tij të gjatë, ku gjeti rast të mbronte edhe ministreshën e vet, konkubinën e preferuar, Ogerta Manastirliu, Rama ra edhe në kontradiktë. Sepse duke dashur të shante platformën online, ai kritikoi "pa dashje" dhunën që politika shqiptare prodhon çdo ditë, duke e quajtur burim frymëzimi për dhunën që reflektohet në rrjetin TikTok.
Duke dashur t'i bjerë opozitës, duke përmendur rastet e ndalimit të fjalës së dishepujve të tij nga deputetët e opozitës, Rama pranoi atë që ne kemi kohë që e themi: Shqipëria është kthyer në një arenë dhune, ku i pari që dhunon është vetë Kryeministri. Pas tij vijnë politikanët, kriminelët që bredhin të lirë rrugëve, gjykatat, e kështu me radhë dhe kjo natyrshëm reflektohet edhe në rrjetet sociale.
Por Rama e gjeti një fajtor, i bëri gjyqin dhe shpalli vendimin: Është platforma online TikTok. Prandaj TikTok do të mbyllet për një vit duke e bërë Shqipërinë, vendin e dytë, pas Turqisë që ndalon rrjetet sociale për qytetarët e vet.
Por a është ky vërtet një akt kujdesi nga një Kryeministër për popullin e tij?
Duke njohur Edi Ramën, duke iu referuar historisë së pushtetit të tij, kjo duket të jetë e vështirë.
Dhe ja pse:
-Rasti me të cilin Edi Rama e lidhi vendimin e tij, pra vrasja e 14 vjeçarit, nuk ka lidhje me TikTok. Është plotësisht e vërtetë që rrjetet sociale janë burim bullizimi dhe dhune, por ndalimi i tyre nuk është zgjidhja. TikTok do të mbyllet për një vit, po pastaj?
-Mbyllja e TikTok është një rast i pastër i ndalimit të fjalës së lirë, pikërisht në prag të zgjedhjeve të përgjithshme. Me miliona përdorues dhe shikueshmëri shumë të lartë, Rama nuk e kontrollon dot TikTok-un dhe të vërtetat mbi pushtetin e tij, që mund të qarkullonin në këtë platformë. Prandaj, duke përdorur fatkeqësinë e një fëmije, e mbylli. A mund të jetë vertet rastësi mbyllja e TikTok para zgjedhjeve? Jo!
-TikTok është vertet një platformë ku qarkullojnë video bullizuese, me dhunë dhe pamje te ndaluara. Kontrolli i këtyre videove të dëmshme duhet bërë patjetër. Por TikTok është vetem një platformë dhe ato të tjerat, META, Youtube, X etj nuk janë më pak të pastra. Ato video që janë ndaluar në TikTok qarkullojnë edhe në platformat e tjera. Pra, çfarë fituam?
-Po me lirinë e shprehjes çfarë ndodh? Platformat online janë mediumet e reja të shprehjes së fjalës dhe kjo është e pranuar botërisht. Çdo media dhe jo vetëm, po punon në drejtim të zhvillimit online dhe ndalimi i tyre është i njëjtë me moratoriumin e një medieje, televizioni, rrjeti i çfarëdo forme qoftë. Kush do ta mbajë përgjegjësinë e shkeljes së një të drejte themelore.
-TikTok nuk është një platformë që vjen nga Marsi. Ajo ka një seli e ca pronarë. Pse i ra shkurt Edi Rama? Pse nuk ndoqi modelin e Australisë që e bllokoi për personat nën 16 vjeç? Pse nuk u përpoq të lidhej me platformën e të gjente një zgjidhje pa kaluar në ekstrem?
-Ka vetëm një model të ngjashëm në botë dhe ky vjen nga Turqia. Erdogan ka bërë disa herë manovra të tilla, sa herë nuk ka pasur interes që populli i tij të ketë akses online. Një model të tillë ka edhe Koreja e Veriut apo vende të tjera diktatoriale. A po rrëshqasim edhe ne në këtë vorbull?
Le ta theksojmë edhe nje herë atë që e thamë më lart: Po, rrjetet sociale gjenerojnë dhunë dhe ato duhen rregulluar. Por, e sigurta është që mbyllja as për një muaj, e as për një vit, nuk e zgjidh këtë. E zgjidh edukimi dhe ndërtimi i një vendi normal, që fatkeqësisht Shqipëria është shume larg. E zgjidh një Kryeministër dhe qeveri që punon për një vend të tillë, por jo një si ky i yni që, pasi na e ka bërë peshqesh dhunën, na paralajmëron se shumë shpejt do të na heqë edhe të drejtën për të folur./Pamfleti
Lini një Përgjigje