FLASH
Shkruar nga Pamfleti
Presidenti amerikan Donald Trump kërcënoi të mërkurën me vendosjen e sanksioneve të reja ndaj Moskës, nëse Rusia nuk arrin një marrëveshje për t’i dhënë fund luftës trevjeçare kundër Ukrainës.
Në lidhje me “ultimatumin” e presidentit amerikan ka ardhur dhe reagimi i parë nga pala ruse.
Presidenti Vladimir Putin është gjithnjë e më shumë i shqetësuar për sanksionet në ekonominë ruse pasi Donald Trump po e shtyn ti japë fund konfliktit në Ukrainë, raporton Reuters.
Ekonomia e Rusisë, e nxitur nga eksportet e naftës, gazit dhe mineraleve, u rrit fuqishëm gjatë dy viteve të fundit, pavarësisht raundeve të shumta të sanksioneve perëndimore të vendosura pas pushtimit të Ukrainës në vitin 2022.
Por aktiviteti i brendshëm është tendosur muajt e fundit nga mungesa e fuqisë punëtore dhe normat e larta të interesit të vendosura për të trajtuar inflacionin, i cili është përshpejtuar nën shpenzimet rekord ushtarake.
Trump, i cili u kthye në detyrë të hënën, është zotuar të zgjidhë me shpejtësi konfliktin e Ukrainës, më i madhi në Evropë që nga Lufta e Dytë Botërore.
Këtë javë ai tha se do të ketë më shumë sanksione, si dhe tarifa, ndaj Rusisë ka të ngjarë nëse Putini nuk negocion, duke shtuar se Rusia po shkonte drejt "telasheve të mëdha" në ekonomi.
Një ndihmës i lartë i Kremlinit tha të martën se Rusia deri më tani nuk kishte marrë asnjë propozim specifik për bisedime.
Zëdhënësi i Kremlinit, Dmitry Peskov, deklaroi se Rusia është gati për dialog, por është ende në pritje të sinjaleve të cilat ende nuk i ka marrë.
“Jemi gati për një dialog të barabartë, një dialog të respektueshëm reciprok. Ne jemi duke pritur për sinjale që ende nuk kanë mbërritur. Rusia nuk sheh asgjë të re në kërcënimet e Donald Trump për të vendosur sanksione. Atij i pëlqejnë këto metoda, të paktën i kanë pëlqyer gjatë presidencës së tij të parë”, tha Peskov.
Presidenti Putin ka paraqitur kërkesa maksimaliste për një marrveshje paqeje, përfshirë tërheqjen e Ukrainës nga territore që ende mbahen nën kontrollin e Kievit. Në anën tjetër, presidenti ukrainas Volodymyr Zelensky ka përjashtuar çdo mundësi për lëshime territoriale, duke theksuar se është i hapur për rikthimin e këtyre territoreve përmes mjeteve diplomatike.
Ndërkohë, Kievi ka kërkuar garanci sigurie nga NATO dhe SHBA, për vendosjen e trupave paqeruajtëse perëndimore, përfshirë forcat amerikane.
Në një postim në platformën e tij, Truth Social, Trump i bëri thirrje Putinit të arrijë një marrëveshje “tani” dhe kërcënoi me vendosjen e sanksioneve shumë të ashpra ndaj Moskës, nëse konflikti nuk zgjidhet.
Lini një Përgjigje