FLASH
Shkruar nga Pamfleti
Një 35-vjeçar që vuante një dënim me burg në Turqi vrau nënën, vajzën e mitur dhe ish-bashkëshorten në Ankara, para se të kryente vetëvrasje. Ngjarja ndodhi gjatë një periudhe lejeje të përkohshme nga burgu.
Recep Cengiz po vuante një dënim katërvjeçar për mashtrim dhe kërcënim me armë. Autoritetet i kishin dhënë një leje 11-ditore. Pas daljes nga burgu, ai u drejtua në lagjen Kuşcağız në kryeqytet.
Sipas të dhënave paraprake, ai u përball fillimisht me nënën e tij, Azize Cengiz, 57 vjeç, dhe vajzën 8-vjeçare, Azra. Pas një debati, ai i qëlloi për vdekje. Më pas vendosi trupat në bagazhin e automjetit.
Më vonë, ai shkoi në banesën e ish-bashkëshortes, Beyzanur Uçan Cengiz, me të cilën ishte i divorcuar. Ai u paraqit si korrier dhe e qëlloi në prag të derës. Pas kësaj, drejtoi armën nga vetja dhe vrau veten.
Pas ngjarjes, autoritetet konfirmuan se 35-vjeçari fillimisht qëndronte në një burg të mbyllur dhe më pas e transferuan në një institucion të hapur. Hetuesit po verifikojnë edhe dyshimet se ai kishte dëmtuar instalimet elektrike në banesën e ish-bashkëshortes për të shmangur identifikimin nga kamerat e sigurisë.
Policia po vijon hetimet për të sqaruar rrethanat dhe motivin e krimit.
Lini një Përgjigje