FLASH
Shkruar nga Pamfleti
Agjencia e inteligjencës ushtarake ukrainase GUR bëri një pretendim të fortë sot dhe njoftoi se presidenti rus Vladimir Putin po përgatitet të shpallë fitoren më 24 shkurt 2025, ditën që shënon tre vjet nga fillimi i luftës ruso-ukrainase.
Sipas GUR, Vladimir Putin pritet ta paraqesë njoftimin jo vetëm si një triumf mbi Ukrainën, por edhe mbi NATO-n, duke e portretizuar konfliktin si një humbje më të gjerë për Perëndimin.
E hëna shënon përvjetorin e tretë të një lufte të shkaktuar nga pushtimi rus i Ukrainës, megjithëse origjina e konfliktit daton që nga viti 2014 me aneksimin e Krimesë.
"Rusia po përgatitet të shpallë një "fitore" të supozuar në luftën kundër Ukrainës deri në "datën" - 24 shkurt 2025, përvjetori i tretë i fillimit të luftës në shkallë të gjerë", njoftoi agjencia GUR.
Lëvizja - nëse ndodh - vjen mes përpjekjeve intensive për t'i dhënë fund luftës nën udhëheqjen e Donald Trump dhe administratës së tij, por me frikën në Evropë dhe Ukrainë se një zgjidhje do t'i jepte avantazhin Rusisë, duke e shpërblyer Putinin për agresionin e tij ushtarak.
Presidenti amerikan nisi një sulm të ashpër ndaj homologut të tij ukrainas këtë javë, duke e fajësuar atë për luftën në vendin e tij. Zelensky nga ana e tij akuzoi presidentin amerikan se ishte viktimë e lajmeve të rreme ruse.
Trump u përgjigj duke e quajtur Zelenskyn "një diktator pa zgjedhje".
Duke u rreshtuar me Trump, aleati i tij Elon Musk pretendoi dje se presidenti ukrainas drejton një "makineri mashtrimi që ushqehet me kufomat e ushtarëve".
Musk u pajtua me thirrjet e Trump që ukrainasit të thërrisnin zgjedhje, por pretendoi se Zelensky i anuloi ato sepse "e di se do të humbasë ".
Një qëllim kryesor i strategjisë së Kremlinit, sipas inteligjencës ukrainase, është të paraqesë Putinin si një politikan të arsyeshëm të gatshëm për të negociuar, ndërsa karakterizon çdo vend që kundërshton përfitimet territoriale ruse si një "armik të paqes".
Raporti akuzon gjithashtu Moskën për shtimin e përpjekjeve për destabilizimin e brendshëm të Ukrainës, përhapjen e dezinformatave midis qytetarëve të saj dhe minimin e mbështetjes nga aleatët perëndimorë.
GUR deklaroi se "Shërbimet speciale të shtetit agresor të Rusisë janë udhëzuar nga krerët e Kremlinit që të shfrytëzojnë maksimalisht intensifikimin e përpjekjeve diplomatike nga administrata e re amerikane për t'i dhënë fund luftës ruso-ukrainase dhe takimin dypalësh të delegacioneve amerikane dhe ruse në Arabinë Saudite më 18 shkurt 2025 në fushata subversive informative dhe psikologjike".
Një qëllim kryesor është "mbulimi i statusit të agresorit dhe kriminelit të luftës të izoluar nga bota e qytetëruar me petkun e një gjoja "anës konstruktive të konfliktit" të gatshëm për një zgjidhje paqësore".
Makina e propagandës dhe shërbimet e inteligjencës së Putinit "me udhëzime nga Kremlini po intensifikojnë përpjekjet për të nxitur mosbesimin midis shoqërisë ukrainase, për të destabilizuar situatën brenda vendit tonë dhe për të diskredituar Ukrainën midis shteteve partnere që ofrojnë ndihmë kritike ushtarake për forcat e sigurisë dhe mbrojtjes në luftën kundër pushtuesve", tha GUR, e kryesuar nga gjeneral-lejtnant Kyrylo Budanov.
Kreu i shërbimit inteligjent të Ukrainës parashikoi se një armëpushim mund të ndodhë këtë vit, por paralajmëroi se ai mund të jetë jetëshkurtër.
Lini një Përgjigje