FLASH
Shkruar nga Pamfleti
Vendimi pas dështimit të bisedimeve në Pakistan rrit tensionet dhe çon çmimet e naftës mbi 100 dollarë për fuçi
Presidenti i Shteteve të Bashkuara, Donald Trump, deklaroi se Marina amerikane do të nisë bllokimin e “çdo anijeje që përpiqet të hyjë ose të dalë nga Ngushtica e Hormuzit”, pas dështimit të bisedimeve të paqes me Iranin në Islamabad gjatë fundjavës.
Në një postim në rrjetet sociale të dielën, Trump theksoi se ka urdhëruar gjithashtu Marinën amerikane të ndalojë dhe të kontrollojë çdo anije në ujërat ndërkombëtare që ka paguar tarifë ndaj Iranit. “Asnjë anije që paguan një tarifë të paligjshme nuk do të ketë kalim të sigurt në det të hapur,” deklaroi ai.
Presidenti shtoi se në këtë operacion do të përfshihen edhe “vende të tjera”, pa dhënë detaje të mëtejshme mbi partnerët ndërkombëtarë.
Në postimin e publikuar në platformën Truth Social, Trump akuzoi Iranin për zhvatje, duke pretenduar se Teherani po bllokon Ngushticën e Hormuzit, përmes së cilës zakonisht kalon rreth 20 për qind e naftës botërore, duke vendosur mina detare.
“Ata duan para dhe, më e rëndësishmja, duan armë bërthamore,” shkroi Trump. Ai paralajmëroi gjithashtu se çdo veprim armiqësor nga ana e Iranit do të marrë përgjigje të ashpër: “çdo iranian që qëllon ndaj nesh ose ndaj anijeve paqësore do të shkatërrohet.”
Sipas deklaratave të fundit, Marina amerikane ka nisur tashmë operacionet për gjetjen dhe neutralizimin e minave të vendosura në ngushticë.
Ndërkohë, ushtria amerikane njoftoi se do të vendosë një bllokadë ndaj çdo anijeje që hyn ose del nga portet dhe zonat bregdetare të Iranit, por shtoi se do të lejojë anijet e tjera të kalojnë nëpër Ngushticën e Hormuzit, disa orë pasi Presidenti Donald Trump kishte deklaruar se Shtetet e Bashkuara do ta bllokonin plotësisht këtë rrugë detare me rëndësi jetike.
Komanda Qendrore e SHBA-së bëri të ditur në një deklaratë se bllokada ndaj porteve iraniane do të nisë të hënën në orën 10:00 sipas kohës lindore. Ajo theksoi se forcat amerikane “nuk do të pengojnë lirinë e lundrimit për anijet që kalojnë në Ngushticën e Hormuzit drejt ose nga porte jo-iraniane” .
Megjithëse deklarata theksonte se masa ishte “në përputhje me shpalljen e presidentit”, ajo dukej se zbuste qëndrimin e mëparshëm të Trump, i cili kishte premtuar të bllokonte “çdo dhe të gjitha anijet që përpiqen të hyjnë ose të dalin nga Ngushtica e Hormuzit”. Në një intervistë për Fox News, ai kishte këmbëngulur se do të ishte një “bllokadë e plotë” dhe se kalimi në këtë rrugë do të ishte “gjithçka ose asgjë”.
Njoftimi i Trump e shtoi pasigurinë mbi armëpushimin tashmë të brishtë midis Iranit dhe Shteteve të Bashkuara, pasi bisedimet maratonë për paqe mes drejtuesve të lartë të të dy vendeve në Pakistan përfunduan pa një marrëveshje konkrete.
Një këshilltar i Mojtaba Khameneit, udhëheqësit suprem, paralajmëroi se Irani ka “leva të mëdha të pashfrytëzuara” për t’iu përgjigjur çdo bllokade detare. Negociatori kryesor iranian, Mohammad Bagher Ghalibaf, njëkohësisht kryetar i Parlamentit, iu drejtua konsumatorëve amerikanë duke thënë: “Së shpejti do t’ju marrë malli për benzinën 4–5 dollarë.”
Që nga fillimi i luftës, Irani ka kufizuar lëvizjen e anijeve në ngushticë, përmes së cilës zakonisht kalon rreth 20 për qind e naftës botërore, duke lejuar kryesisht vetëm anijet e veta dhe disa të tjera. Si rezultat, çmimet globale të naftës janë rritur me më shumë se 50 për qind gjatë konfliktit. Shtetet e Bashkuara kanë kërkuar që Irani ta rihapë këtë rrugë dhe e kanë kushtëzuar armëpushimin me këtë veprim.
Zëvendëspresidenti JD Vance, i cili drejtoi ekipin negociator amerikan, deklaroi të dielën herët se bisedimet në Islamabad, takimi më i lartë i drejtpërdrejtë midis dy vendeve që nga Revolucioni Islamik i vitit 1979, përfunduan pasi Irani zgjodhi “të mos pranojë kushtet tona”. Nga ana tjetër, Ghalibaf deklaroi në rrjetet sociale se Shtetet e Bashkuara nuk arritën të fitojnë besimin e delegacionit iranian.
Analistët vlerësojnë se çështjet që ndajnë dy vendet janë tepër komplekse dhe përfshijnë fatin e rreth 900 paund uraniumi të pasuruar, të ardhurat iraniane të ngrira jashtë vendit dhe kontrollin e Ngushticës së Hormuzit.
As Trump dhe as Ghalibaf nuk përjashtuan mundësinë e negociatave të tjera. Trump deklaroi se presioni i tij e ka detyruar Iranin “të ulet në tryezën e bisedimeve” dhe shtoi se beson se SHBA do të arrijë “gjithçka” që kërkon.
Çmimet e naftës u rritën të dielën pas dështimit të bisedimeve. Nafta Brent, standardi global, u rrit me më shumë se 7 për qind, duke arritur rreth 102 dollarë për fuçi. Trump minimizoi ndikimin ekonomik të luftës, por pranoi se çmimet mund të mbeten të njëjta ose pak më të larta deri në zgjedhjet e nëntorit.
Investitorët dhe analistët janë të përqendruar te ndërprerjet e vazhdueshme të transportit në Ngushticën e Hormuzit, një rrugë e ngushtë midis Iranit dhe Omanit ku kalon rreth një e pesta e furnizimit global me naftë dhe sasi të konsiderueshme gazi natyror.
Kontratat e indeksit S&P 500 ranë me rreth 1 për qind. Tregjet në Azi shënuan rënie, me indeksin Nikkei në Japoni dhe Kospi në Korenë e Jugut që humbën më shumë se 1 për qind. /Përshtati Pamfleti/
Trump po i vendos djemtë dhe vajzat e marinës si "ushqim" për kafshët e egra në Gjirin Persik. Gjë e çuditshme, prindërit në shtëpi janë në rregull me këtë akt të çmendur egoist dhe të paligjshëm! Do t'i gris diplomat e mia meqenëse tani jetoj në "Perëndimin e Egër".
Po na shkaterron te gjitheve o gomar!