FLASH
Shkruar nga Pamfleti
Sekretari amerikan i Energjisë, Chris Wright, u dërgoi një mesazh të drejtpërdrejtë vendeve evropiane, të cilat këtë javë po përballen me temperatura rekord, duke u kërkuar të ndalojnë alarmizmin për valën e të nxehtit. Sipas tij, i ftohti vazhdon të jetë shumë më vdekjeprurës sesa temperaturat e larta.
"Më shumë njerëz vdesin gjithmonë gjatë dimrit sesa në verë, sepse i ftohti është një vrasës shumë më i madh se vapa", deklaroi Wright përmes një videomesazhi në konferencën e Alliance for Responsible Citizenship, një forum ku morën pjesë figura të njohura konservatore, shumë prej të cilave kundërshtojnë konsensusin shkencor mbi ndryshimet klimatike.
Wright iu referua krizës energjetike që goditi Evropën pas pushtimit rus të Ukrainës në vitin 2022, duke argumentuar se rritja e çmimeve të energjisë pati pasoja të rënda për vdekshmërinë gjatë dimrit. "Pasojat e atij zhvillimi mbi vdekshmërinë ishin katastrofike", tha ai.
Deklaratat e tij u bënë në një kohë kur qeveritë evropiane kanë paralajmëruar për rreziqet që sjell vala aktuale e të nxehtit, e cila rikthen kujtimet e verës së vitit 2022, kur mbi 60 mijë persona humbën jetën në kontinent si pasojë e temperaturave ekstreme.
Në konferencë morën pjesë edhe figura të njohura politike dhe ekonomike, mes tyre lideri i Reform UK, Nigel Farage, ish-kryeministri britanik Boris Johnson dhe drejtori ekzekutiv i Bayer, Bill Anderson.
Megjithëse në Evropë numri i vdekjeve të lidhura me temperaturat e ulëta mbetet më i lartë se ai i shkaktuar nga i nxehti, ekspertët paralajmërojnë se ndryshimet klimatike po i bëjnë valët e të nxehtit më të shpeshta, më intensive dhe më vdekjeprurëse. Në Shtetet e Bashkuara, ndërkohë, temperaturat e larta konsiderohen shkaku kryesor i vdekjeve të lidhura me kushtet ekstreme të motit.
Temperaturat rekord të muajit qershor kanë shkaktuar mbylljen e shkollave, probleme në transport dhe vështirësi në furnizimin me energji elektrike në disa vende evropiane. Në Francë, rreth 40 persona kanë humbur jetën duke u përpjekur të freskoheshin në ujë, ndërsa disa aktivitete të Javës së Veprimit për Klimën në Londër u anuluan për shkak të kushteve ekstreme.
Ndryshe nga administrata amerikane, e cila promovon gazin natyror si zgjidhjen kryesore energjetike, Bashkimi Evropian po përshpejton tranzicionin drejt burimeve të rinovueshme. Presidenti Donald Trump ka kritikuar vazhdimisht investimet evropiane në energjinë e erës dhe atë diellore, duke i cilësuar ato si "energjitë e humbura".
"Duhet ta kuptojmë ndryshimin klimatik për atë që është: një fenomen që zhvillohet ngadalë dhe që do të përballohet me teknologji më të mira. Sot, katalizatori më i rëndësishëm është pa diskutim gazi natyror", deklaroi Wright.
Lini një Përgjigje