FLASH
Shkruar nga Pamfleti
Qindra qytetarë në Danimarkë dhe Grenlandë janë ngritur në protesta të koordinuara këtë fundjavë, në përgjigje të kërcënimeve të përsëritura të presidentit amerikan Donald Trump për të vendosur kontrollin amerikan mbi ishullin arktik strategjik.
Në Kopenhagë, Aarhus, Aalborg dhe Odense, protestuesit valëvitën flamurin kuq e bardhë të Grenlandës, duke mbajtur pankarta me mesazhe të qarta: “Duart larg Grenlandës!”. Protestat u organizuan nga shoqata grenlandeze në bashkëpunim me ActionAid Denmark, dhe u mbajtën në mënyrë të qëllimshme gjatë vizitës së një delegacioni dypartiak të senatorëve amerikanë në Kopenhagë.
Camilla Siezing, kryetare e Shoqatës së Përbashkët Inuit, theksoi se “ne protestojmë kundër deklaratave amerikane dhe ambicieve për të aneksuar Grenlandën. Kërkojmë respekt për Mbretërinë Daneze dhe për të drejtën e vetëvendosjes së Grenlandës. Shpresojmë të tregojmë se jemi të shumtë ata që mbështesim këtë qëndrim.” Një protestë tjetër u mbajt edhe në kryeqytetin grenlandez, Nuuk, ku një protestuese i dërgoi një mesazh të prerë presidentit amerikan: “Ne nuk jemi për shitje!”
Kriza nisi pasi Trump kërcënoi se “çdo opsion përveç kontrollit amerikan mbi Grenlandën është i papranueshëm”, duke e konsideruar territorin si thelbësor për sigurinë kombëtare të SHBA dhe për forcimin e pozicionit të NATO-s në Arktik. Kjo retorikë e ka përkeqësuar ndjeshëm klimën diplomatike midis Uashingtonit dhe Kopenhagës, duke shkaktuar edhe reagime të ashpra nga anëtarët evropianë të NATO-s.
Për të qetësuar situatën, një delegacion i senatorëve amerikanë mbërriti në Kopenhagë për takime me liderët danezë dhe grenlandezë. Në një konferencë për shtyp, senatori demokrat Chris Coons pranoi se “ritmi i deklaratave të administratës Trump nuk ka qenë konstruktiv”. Ai shprehu respekt për popullin indigjen të Grenlandës, duke vlerësuar aftësinë e tyre për të ndërtuar një jetë të qëndrueshme në një mjedis ekstrem. Delegacioni amerikan gjithashtu vizitoi një varrezë ushtarake për të vendosur një kurorë në nderim të ushtarëve danezë që kanë luftuar përkrah SHBA në konfliktet ndërkombëtare, përfshirë Afganistanin.
Ambiciet e Trump për Grenlandën zbulojnë jo vetëm një qasje të re neokoloniale amerikane ndaj territoreve strategjike, por edhe një mosrespektim të të drejtës ndërkombëtare dhe sovranitetit të popujve indigjenë. Përpjekja për të blerë ose aneksuar Grenlandën është parë si shkallëzim agresiv i politikës amerikane në Arktik, që ndërlidhet me interesat energjetike, klimatike dhe ushtarake. Për momentin, reagimi civil dhe diplomatik në Danimarkë dhe Grenlandë ka qenë i fortë dhe dinjitoz. Por tensioni në rritje tregon se lufta për Arktikun sapo ka nisur – dhe popujt indigjenë janë të parët që preken nga kjo garë e re globale për territor dhe pushtet.
Lini një Përgjigje