FLASH
Shkruar nga Pamfleti
Ai dhe zyrtarë të tjerë republikanë kanë theksuar rëndësinë strategjike të ishullit, duke përfshirë afërsinë e Groenlandës me Rusinë dhe mineralet kritike që ndodhen brenda kufijve të saj.
Groenlanda të jetë shteti i 51-të i SHBA-së?! Idea është hedhur nga Randy Fine, republikan nga Florida, i cili paraqiti në Kongresin amerikan një projektligj që synon të autorizojë Presidentin Donald Trump, "të ndërmarrë hapat e nevojshëm" për të blerë Groenlandën dhe për ta vendosur atë në rrugën e duhur për t'u bërë pjesë e Shteteve të Bashkuara.
"Mendoj se është në interesin e botës që Shtetet e Bashkuara të ushtrojnë sovranitet mbi Groenlandën", tha Fine në një intervistë për Fox News Digital.
Ai shtoi se Kongresi do të duhej të zgjidhte ta bënte Groenlandën një shtet brenda SHBA-së. “Kjo thjesht do ta autorizonte Presidentin të bënte atë që po bën, ndërsa Kongresi ta mbështeste”, tha ai.
Kjo do e përshpejtonte bërjen e shtetit, por prapë do të varej nga Kongresi nëse do ta pranonte këtë ose jo.
Sekretari i Shtetit Marco Rubio tha se do të takohej gjatë kësaj jave me zyrtarë nga Danimarka për të diskutuar për Groenlandën.
Trump ka shtyrë publikisht idenë që SHBA-të të blejnë territorin e ishullit Arktik që nga mandati i tij i parë në Shtëpinë e Bardhë.
Ai dhe zyrtarë të tjerë republikanë kanë theksuar rëndësinë strategjike të ishullit, duke përfshirë afërsinë e Groenlandës me Rusinë dhe mineralet kritike që ndodhen brenda kufijve të saj.
Fine u pajtua me këto pika, ndërsa argumentoi gjithashtu se sundimi i SHBA-së do të ishte më i mirë edhe për ata që jetojnë në Grenlandë.
"Shkalla e varfërisë së tyre është e lartë. Danimarka nuk i ka trajtuar mire. Kur lufta erdhi në qytet, Danimarka nuk mundi t'i mbronte. A e dini kush e mbrojti Groenlandën gjatë Luftës së Dytë Botërore? Ne e mbrojtëm", tha ai.
Dhe ndërsa shumica e republikanëve kanë pranuar se e kuptojnë argumentin e Trump se pse zotërimi i Grenlandës do të ishte në dobi të SHBA-së, ligjvënësit republikanë u tronditën disi pasi sekretarja e shtypit e Shtëpisë së Bardhë, Karoline Leavitt, nuk e përjashtoi përdorimin e forcës ushtarake për të përvetësuar ishullin gjatë një konference për shtyp të kohëve të fundit këtë muaj.
I pyetur nëse do të mbështeste përdorimin e forcës ushtarake, Fine tha se " mënyra më e mirë për të fituar Groenlandën është vullnetarisht".
"Shkalla e varfërisë në Groenlandë është shumë, shumë më e lartë se në Danimarkë. Vendi drejtohet nga socialistët dhe nuk është në interesin e Amerikës që një territor kaq i madh midis Shteteve të Bashkuara dhe Rusisë të drejtohet nga socialistët", tha Fine.
Kushtetuta e SHBA-së i jep Kongresit fuqinë për të pranuar shtete të reja.
Zakonisht kjo kërkon që Kongresi të miratojë një projektligj që autorizon shtetin e ri pasi të formohet një territor, pas të cilit ky territor duhet të hartojë një kushtetutë shtetërore të miratuar nga njerëzit që jetojnë atje.
Kongresi duhet të votojë përsëri për të pranuar atë shtet të ri përpara se kjo të bëhet përfundimtare me nënshkrimin e presidentit. /Përshtatur nga FoxNews/
Lini një Përgjigje