FLASH
Shkruar nga Pamfleti
Nga reforma e komandave teatrore deri te spastrimet e brendshme, Xi Jinping ka transformuar rrënjësisht dhe forcuar Ushtrinë Çlirimtare Popullore të Kinës. Ja si e bëri këtë...
Gjithçka nisi në vitin 2012, pothuajse 15 vjet më parë, kur Xi Jinping mori kontrollin e Komisionit Qendror Ushtarak, organit më të lartë komandues të forcave të armatosura kineze. Në atë periudhë, ushtria kineze (PLA) ishte ende e ndërtuar mbi epërsinë e forcave tokësore dhe mbi një strukturë burokratike të projektuar për të përballuar luftërat e së kaluarës.
Brenda pak vitesh, Xi do të niste një nga reformat ushtarake më të thella që nga themelimi i Republikës Popullore të Kinës. Objektivat ishin dy: përgatitja e Kinës për konflikte moderne, të dominuara nga teknologjia dhe koordinimi ndërmjet fushave të ndryshme të luftimit, si dhe forcimi i kontrollit politik të Partisë Komuniste mbi forcat e armatosura.
Riorganizimi ushtarak i Xi
Rezultati ishte një sistem më i centralizuar, më i shpejtë dhe me një qëndrim më të ashpër në rajon, veçanërisht rreth Tajvanit dhe në Detin e Kinës Jugore. Siç shkruan media The Print, kthesa vendimtare erdhi mes viteve 2015 dhe 2016 me krijimin e të ashtuquajturave komanda teatrore, të cilat zëvendësuan rajonet e vjetra ushtarake.
Kina u bë kështu vendi i dytë pas Shteteve të Bashkuara që u pajis me një strukturë të përhershme komandimi të përbashkët, të aftë për të integruar ushtrinë tokësore, marinën, forcën ajrore dhe forcën raketore. Shtatë distriktet ushtarake u bashkuan në 5 zona të mëdha operative, Lindje, Perëndim, Jug, Veri dhe Qendër, secila e ndërtuar mbi prioritete të caktuara strategjike.
Komanda Lindore, me seli në Nankin, fokusohet te Tajvani; Komanda Perëndimore mbikëqyr Tibetin dhe Xinjiangun dhe ndjek kufirin me Indinë; ndërsa Komanda Jugore kontrollon Detin e Kinës Jugore.
Një reformë e tillë shërbeu për të kapërcyer kufizimet në koordinimin ndërmjet degëve të ndryshme të ushtrisë dhe për të përgatitur PLA-në për të ashtuquajturat “luftëra të informatizuara”, pra konflikte me intensitet të lartë teknologjik, ku të dhënat, rrjetet dhe shpejtësia e vendimmarrjes kanë më shumë peshë sesa numri i ushtarëve.
Pekini shfaq forcën
Megjithatë, transformimi nuk kishte të bënte vetëm me efikasitetin ushtarak. Xi e përdori reformën edhe për të konsoliduar pushtetin e tij personal. Gjatë viteve të fundit, mijëra oficerë janë goditur nga fushatat kundër korrupsionit, të cilat kanë prekur madje edhe nivelet më të larta të Komisionit Qendror Ushtarak.
Këto spastrime kanë eliminuar rrjete të pavarura pushteti brenda forcave të armatosura, duke rritur varësinë politike të aparatit ushtarak nga udhëheqja e Partisë Komuniste.
Në të njëjtën kohë, Kina ka investuar në dronë, luftë elektronike, inteligjencë artificiale dhe sisteme të integruara komandimi, ndërsa stërvitjet ushtarake rreth Tajvanit janë bërë gjithnjë e më të shpeshta.
Arkitektura e re ushtarake kineze synon të garantojë një reagim të koordinuar dhe jashtëzakonisht të shpejtë në rast të një krize rajonale. Sigurisht, mbeten ende disa probleme strukturore: rivalitetet ndërmjet degëve të ndryshme të ushtrisë, vështirësitë logjistike dhe shqetësimet se besnikëria politike mund të shpërblehet më shumë sesa kompetenca operacionale.
Megjithatë, pas më shumë se një dekade reformash, mesazhi i Xi Jinping duket i qartë: PLA-ja nuk duhet të jetë vetëm një ushtri moderne, por mbi të gjitha armatura e Dragoit kinez. /Përshtati Pamfleti/
Lini një Përgjigje