FLASH
Shkruar nga Pamfleti
Ju ftojmë të ndiqni nje bllok lajmesh me zhvillimet kryesore nga kronika e zezë, ku ndër të tjera veçojmë:
Në GJKKO është shtyrë gjyqi në themel ndaj kryebashkiakut Erion Veliaj, i cili nuk ishte i pranishëm në seancë dhe u përfaqësua nga avokati i tij. Mbrojtja ka kundërshtuar masën e sigurisë dhe ka pretenduar shkelje procedurale, ndërsa gjykata e shtyu seancën për shkak të mungesës së disa avokatëve dhe çështjeve teknike, duke vendosur edhe pezullim të afateve të paraburgimit.
Një tjetër dosje e rëndë është ajo e zhdukjes së Eglant Koçit. Një 25-vjeçar kamerier është lënë në burg si i dyshuar për përkrahje të autorit të krimit, ndërsa pronari i lokalit është shpallur në kërkim. Hetimet dyshojnë për rrëmbim dhe vrasje, si dhe përpjekje për fshehjen e trupit, i cili ende nuk është gjetur.
Në fushën e krimit të organizuar, Apeli i GJKKO ka lënë në burg vëllezërit Hoxhosmani, të akuzuar për pjesëmarrje në një organizatë ndërkombëtare trafiku droge. Në Tiranë është goditur edhe një grup tjetër i dyshuar për trafik armësh, me disa arrestime dhe sekuestrime municionesh.
Në Shëngjin është regjistruar një plagosje me armë zjarri pas një konflikti në një lokal, ku një 35-vjeçar mbeti i plagosur dhe dy persona janë shpallur në kërkim. Po ashtu, një 22-vjeçar është arrestuar për një urdhër-arrest ndërkombëtar nga Spanja për vrasje në tentativë.
Një tjetër incident ka ndodhur në një institucion shtetëror, ku një punonjës dyshohet se ka goditur një drejtor pas një konflikti për largim nga puna dhe është shpallur në kërkim.
Në aksidentet dhe ngjarjet tragjike, një 15-vjeçar ka humbur jetën pas mbytjes në një pishinë private, ndërsa në aksin Korçë–Bilisht një aksident rrugor ka lënë një drejtues motori në gjendje të rëndë.
Në GJKKO vijon edhe çështja e njohur për tritolin në lokalin e reperit Noizy, ku dëshmia e Kleviol Ahmetit ka sjellë përplasje deklaratash dhe seanca është shtyrë.
Lini një Përgjigje