FLASH
Shkruar nga PamfletiJu ftojmë të ndiqni zhvillimet kryesore nga kronika e zezë deri në këtë orë të ditës, ku ndër të tjera veçojmë:
SPAK ka marrë të pandehur ish-kryebashkiakun socialist Gjolek Guci dhe tre zyrtarë të tjerë për shkelje në një tender prej 493 milionë lekësh për ndërtimin e ujësjellësit rajonal në Memaliaj.
Hetimet kanë zbuluar favorizime për operatorë të caktuar dhe shkelje të barazisë në procedurë.
Ndërkohë, Gjykata e Lartë ka lënë në fuqi konfiskimin e pasurive të ish-gjyqtarit Guxim Zenelaj, duke refuzuar rekursin e tij për deklarim të rremë të pasurisë.
Nga Italia vijnë dy ngjarje tragjike: Familja Kola, që humbi katër anëtarë nga helmimi me monoksid karboni në banesën e tyre në Porcari, kthehet në Shqipëri për t’u përcjellë për në banesën e fundit.
Ndërkohë, identifikohet 32-vjeçari Leonard Fjora që humbi jetën në provincën e Bolonjës, pasi automjeti i tij u përplas me një kamion mbeturinash dhe u përfshi nga flakët.
Në sektorin e krimeve të organizuara, Guardia di Finanza shkatërroi një bandë shqiptare të trafikut të kokainës me bazë në Foligno.
Nga operacioni u arrestuan shtatë persona, përfshirë pesë shqiptarë, dhe u sekuestruan 68 kilogramë kokainë, e ambalazhuar me marka luksoze si “Lacoste” dhe “Ferrari”.
Hetimi zbuloi se një biznesmen shqiptar përdorte restorantin e tij si fasadë për pastrimin e parave.
Nga Hagë, avokati i ish-presidentit Hashim Thaçi, Luka Mishetiç, ka deklaruar se klienti i tij është i pafajshëm dhe se provat e Prokurorisë Speciale nuk arrijnë të provojnë fajësinë e tij përtej çdo dyshimi të arsyeshëm.
Ai argumentoi se Thaçi nuk ka qenë në Kosovë gjatë pjesës së përmendur në aktakuzë dhe se komunikimi i anëtarëve të UÇK-së ka ndodhur përmes deklaratave publike, jo përmes një sistemi tërësisht të centralizuar komandimi.
Gjithashtu, në procesin e vrasjes së Liridona Ademajt, i akuzuari Naim Murseli ka kërkuar të takohet me fëmijët e tij në Suedi dhe me biznesmenin Behgjet Pacolli, por kërkesa e dytë nuk u miratua.
Murseli bashkë me Granit Plavën dhe Kushtrim Kokallën akuzohen për vrasje me motive hakmarrjeje dhe për përfitim financiar, ndërsa një i katërt, që ua shiti armën, pranoi fajësinë.
Turqia tronditet nga një ngjarje tragjike: një 35-vjeçar, i dënuar më parë me katër vite burg, del nga burgu dhe vret ish-gruan, të ëmën, të bijën dhe më pas vetëvritet.
Ndërsa në Kanada, një sulm në një shkollë shkakton 10 të vdekur dhe mbi 25 të plagosur; autori u ekzekutua në vendngjarje dhe motivi i sulmit mbetet i paqartë.
Lini një Përgjigje