FLASH
Shkruar nga Pamfleti
Fenomeni i mashtrimeve online që përdorin emrin e platformës qeveritare e-Albania është rikthyer sërish, duke ngritur shqetësimin e qytetarëve.
Raportime të shumta tregojnë se përdoruesit po marrin mesazhe të rreme, të cilat paraqiten si njoftime zyrtare për pagesa gjobash të automjeteve.
Këto mesazhe përmbajnë linqe të rreme, të cilat i drejtojnë qytetarët drejt faqeve që imitojnë platformën zyrtare. Qëllimi i tyre është vjedhja e të dhënave personale dhe bankare të përdoruesve që bien pre e mashtrimit. Bëhet me dije, se mesazhet shpërndahen nga numra të huaj, në shumë raste me prefikse ndërkombëtare, çka shton dyshimet për një aktivitet të organizuar jashtë vendit.
Specialistët e sigurisë online këshillojnë qytetarët të tregojnë kujdes maksimal dhe të mos klikojnë në linqe të panjohura. Verifikimi i çdo njoftimi duhet të bëhet vetëm përmes kanaleve zyrtare të e-Albania.
Ndërkohë, mbetet e paqartë shkalla e përhapjes së këtij mashtrimi dhe nëse ka persona të dëmtuar financiarisht. Pavarësisht paralajmërimeve të vazhdueshme nga policia dhe thirrjeve për kujdes, mashtrimet online vijojnë të përhapen.
Ndërkohë, ka reaguar edhe Policia e Shtetit lidhur me rritjen e rasteve të mashtrimeve online (phishing), duke paralajmëruar qytetarët për mesazhe të rreme që dërgohen në emër të institucioneve publike, si Posta Shqiptare apo platforma të ngjashme me e-Albania.
Autoritetet theksojnë se kjo është një skemë e përhapur globalisht dhe jo një fenomen i izoluar. Policia u bën thirrje qytetarëve të mos klikojnë në linqe të dyshimta, të mos japin të dhëna sensitive dhe të verifikojnë çdo informacion vetëm në kanalet zyrtare. Çdo rast i dyshimtë duhet të raportohet pranë organeve kompetente.
Nuk lame pisllek pa marre nga bota, mashtrimi, firma piramidale, prostucioni, droga, kazinot, gjobat vjedhacake, etj.