FLASH
Shkruar nga Pamfleti
Në Rrogozhinë, ku po zhvillohen zgjedhjet për kryetarin e bashkisë, një grua është kapur duke fotografuar votën e saj, gjë që ka shkaktuar ndërprerjen e procesit të votimit në qendrën nr. 22-23.
"I është bërë foto fletës së votimit. Do të mbyllet votimi deri sa të vijë kryetari i KZAZ.", u shpreh një vëzhgues.
Ndërkaq një incident i rëndë ka ndodhur mes një vëzhguesi në këtë qendër votimit pas debateve me operatorët dhe gazetarët në qendrën e votimit.
“Na mbylli me çelës! Nuk lejon as operatorët dhe ne na ka mbyllur brenda”, raporton një gazetare.
Shkak i këtij nervozizmi duket se është bërë prekja e fletëve të votimit nga ana e vëzhguesit.
Kujtojmë se rreth 33 mijë qytetarë të Rrogozhinës janë thirrur sërish në votime ditën e sotme. Pas shpalljes së pavlefshme të zgjedhjeve të 14 majit, 2 kandidatët Edison Memolla i PS e Shkëlqim Hoxha i koalicionit “Bashkë Fitojmë” janë sërish në garë për tu rizgjedhur në krye të bashkisë së këtij qyteti.
Janë 54 qendra votimi deri më tani, në të cilat, 32 mijë e 826 qytetarë do të drejtohen, nga ora 07:00-19:00 dhe ndryshe nga 14 maji, do të kenë vetëm një fletë votimi, atë për kryebashkiakun, ku po njëjtë si në zgjedhjet vendore, i pari në fletën e votimit do të jetë i renditur kandidati socialist Edison Memolla dhe numrin 2 do ta mbajë Shkëlqim Hoxha.
Shpresat për këtë të fundit janë shtuar, pasi në këto zgjedhje nuk do të votojnë të burgosurit, që në zgjedhjet e fundit vulosën fitoren e Edison Memollës.
Në KQZ ka mbërritur një kërkesë nga burgjet për votimin e 89 të burgosurve që gëzojnë të drejtën e votës në institucionin e burgut “Kosova”, por afatet nuk premtojnë, e për sa kohë nuk ka një vendim nga Bashkia e KZAZ-ja, në burg nuk do të ngrihet një qendër votimi.
Në zgjedhjet e 14 majit, në Rrogozhinë morën pjesë në votime rreth 11 mijë votues, por me ankesë të koalicioni “Bashkë Fitojmë”, Kolegji Zgjedhor vendosi të shpallë të pavlefshme zgjedhjet pas një sërë shkeljesh.
Lini një Përgjigje