FLASH
Shkruar nga Pamfleti
Ditën e sotme në Gjykatën e Posaçme u mbaj seanca e radhës ndaj ish-ministrit të Mbrojtjes Fatmir Mediu, lidhur me çështjen e Gërdecit.
Gjykata informoi se Ministria e Drejtësisë ka dërguar letërporosinë në SHBA për të marrë në pyetje Patrick Henry dhe përfaqësuesit e kompanisë SAK.
Prokurori i SPAK kërkoi në seancën e radhës se nëse do të jetë gati, mund të pyetet edhe Mediu në cilësinë e të pandehurit.
Në përfundim u vendos që seanca të shtyhet dhe ajo e radhës të mbahet më 21 shkurt, dhe dëshmitari i fundit Ilmi Laçaj refuzoi të jepte deklarime.
GJKKO gjithashtu ka urdhëruar policinë të gjejë ish-sekretaren e ish-ministrit të Drejtësisë Aldo Bumçi, Anjola Agolli, e cila është dëshmitare në procesin Gërdeci.
Gjatë seancës, GJKKO ka kërkuar të gjendet dhe të thirret Anjola Agolli, sekretare e ish ministrit të drejtesise Aldo Bumçi, e cila nuk është gjetur megjithëse SPAK ka vënë më dispozicion një adresë të re të saj.
Ndërkohë u përsërit thirrja për të bashkëpandehurit e tjerë mes tyre Luan Hoxha, Dritan Minxolli dhe Mihal Delijorgji, të cilët nuk janë gjetur në adresat e deritanishme të çuara në gjykata.
Anjola Agolli pritet të pyetet për faksin e famshëm “për Shkëlzenin”.
Zonja në fjalë është marrë në pyetje kur u hetua tragjedia vite më parë dhe do shihet nëse do i qëndrojë asaj dëshmie.
Ish-sekretarja e ish-ministrit të Drejtësisë, Aldo Bumçi, Anjola Agolli, në dëshminë e saj dhënë prokurorëve implikoi direkt Bumçin si ushtar të Shkëlzen Berishës në demontimin e armëve në Gërdec.
Agolli ka pranuar se ajo ka dërguar faksin me shënimin “Për Shkëlzen Berishën…” në një numër faksi të Ministrisë së Mbrojtjes, dhe kujton se “Shkëlzen Berisha erdhi në zyrë dhe u takua me ministrin para se të niste faksin…”
Agolli ka shpjeguar procedurën si e ka protokolluar faksin dhe si është dërguar në Ministrinë e Mbrojtjes.
Bëhet fjalë për një faks privat që ish-ministri Aldo Bumçi i ka dërguar për informim Shkëlzen Berishës, për t’i kujtuar se ia ka firmosur “Memo”-n që aprovonte biznesin e demontimit të armëve në Gërdec.
Ne seancat e zhvilluara së fundmi ishin thirrur nga SPAK për të dëshmuar shtetasit Shkëlzen Madani, Rezart Tershana, Zenun Fero, Dashnor Çaushi dhe Besnik Dauti.
Lini një Përgjigje