FLASH
Shkruar nga Pamfleti
Gjykata e Posaçme e Apelit për Korrupsionin dhe Krimin e Organizuar ka rrëzuar kërkesën e bashkëshortes së kryebashkiakut të Tiranës Erion Veliaj, Ajola Xoxa, duke lënë në fuqi vendimin e Shkallës së Parë për sekuestrimin e celularit të saj. Xoxës i mbetet që të bëjë rekurs brenda 45-ditëve në Gjykatën e Lartë.
“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Engert Pëllumbi, sot më 15.04.2025, shpalli vendimin mbi çështjen penale nr. 92, datë 08.04.2025 regjistrimi, regjistruar mbi ankimin e ankueses A.X., me objekt: “Ankim ndaj vendimit nr. 93, datë 20.02.2025, të Gjykatës së Posaçme të Shkallës së Parë për Korrupsionin dhe Krimin e Organizuar, mbi kundërshtimin e vendimit të prokurorit për sekuestrimin e sendeve”, dhe vendosi:
Miratimin e vendimit nr. 93 Akti, datë 20.02.2025 të Gjykatës së Posaçme të Shkallës së Parë për Korrupsionin e Krimin e Organizuar.
Kundër këtij vendimi mund të bëhet rekurs në Gjykatën e Lartë brenda 45 ditëve nga e nesërmja e njoftimit të tij”, njofton Apeli i GJKKO-së.
Kujtojmë se Xoxa ndodhet në masën ‘detyrim paraqitjeje' për akuzën e fshehjes së pasurisë. Kryebashkiaku i Tiranës Erion Veliaj u arrestua më 10 Shkurt, i akuzuar për korrupsion pasiv dhe pastrim parash.
Lini një Përgjigje