FLASH
Shkruar nga Pamfleti
Kombëtarja shqiptare e futbollit duket se do ketë risi në grumbullimin e parë për kualifikueset e Kupës së Botës 2026. Trajneri Silvinjo është bindur nga aftësitë e kapitenit të Kosovës U-21, Etnik Brruti, me këtë të fundit që sipas mediave “dardane” ka konfirmuar kalimin te Shqipëria, duke cituar trajnerin Tovërlani. Ky i fundit nuk është ndalur dhe ka sulmuar FSHF-në dhe Armand Dukën, duke thënë se nuk kanë forcë të punojnë për dy ekipe.
Situata me Etnik Brrutin
Mesfushori i Kosovës U-21 është pjesë e Malishevës në kampionatin vendas dhe mban shiritin e kapitenit në përfaqësuese. Paraqitjet e mira bënë që trajneri i Dardanëve, Franko Foda, ta ftonte në një "zbor" disa ditor, mirëpo pa e grumbulluar me ekipin e parë.
Tashmë gjërat duket se kanë ndryshuar dhe mediat në Kosovë bëjnë me dije se Etnik Brruti ka pranuar të jetë pjesë e Shqipërisë, dukshëm për dy ndeshjet e Kombëtares për kualifikueset e Kupës së Botës 2026, kundër Anglisë në Londër më 21 mars dhe kundër Andorrës më 24 mars në Tiranë.
Trajneri i Kosovës U-21 sulmon FSHF-në dhe Armand Dukën
Për “Telegrafin”, trajneri i Kosovës U-21, Afrim Tovërlani ka konfirmuar ftesën për Etnik Brruti dhe dëshirën e mesfushorit për t'u bashkuar me Shqipërinë. Ai ka thënë se Brruti kërkon një pasaportë shqiptare pasi disa agjentë "po e mashtrojnë" dhe ai kërkon të kalojë në ligën ruse.
Veç saj, Tovërlani ka sulmuar Federatën Shqiptare të Futbollit dhe kreun e saj Armand Duka, duke i bërë apel për t'i lënë këto ftesa, pasi Kosova nuk ka fuqi të punojë për dy ekipe.
“Por, Etniku na ka treguar se po zgjedh Shqipërinë. Arsyeja është për shkak të pasaportës shqiptare, përmes së cilës mund të transferohet më lehtë në Rusi. Lojtarët tanë po mashtrohen nga disa kuazi-menaxhera, që po i joshin dhe po i mashtrojnë ata.
Nuk kam koment për lojtarët që po tradhtojnë fanelën Dardane dhe që po luajnë me punën, mundin dhe djersën tonë. Këtu kanë faj edhe Armand Duka dhe FSHF që nuk po e ndalin këtë trend. Ne nuk kemi forcë e fuqi që të punojmë për dy ekipe kombëtare", tha Afrim Tovërlani.
Më herët, edhe Ardian Ismajli, Arbnor Muja, Mirlind Daku dhe Ermir Rashica që kanë qenë pjesë e Kosovës, kanë kaluar te Shqipëria.
Lini një Përgjigje