FLASH
Shkruar nga Pamfleti
Kombëtarja shqiptare e futbollit përballet këtë të enjte me një nga ndeshjet më të rëndësishme në historinë e saj, teksa sfidon Poloninë në Varshavë në kuadër të “play-off”-it për Kupën e Botës. Ky është një moment historik për Shqipërinë, që synon për herë të parë një kualifikim në Botëror.
Sipas parashikimeve të publikuara nga kompania e specializuar e statistikave, “OPTA”, shanset e Shqipërisë për të siguruar fitoren brenda 90 minutave janë më të ulëta krahasuar me kundërshtarin. Analiza bazohet në 10 mijë simulime të zhvilluara mbi të dhënat statistikore të të dy ekipeve.
Polonia vjen në këtë përballje me një bilanc më të fortë, pasi grumbulloi 17 pikë në kualifikueset e Grupit G, duke u renditur e dyta pas Holandës. Ky rezultat e vendos atë ndër skuadrat më konkurruese që nuk arritën të fitonin grupin, me vetëm Italinë që ka grumbulluar më shumë pikë në këtë kategori.
Nga ana tjetër, Shqipëria siguroi 14 pikë në grupin e saj. Ky ishte totali më i ulët mes vendeve të dyta në grupet me pesë ekipe, megjithatë kuqezinjtë arritën të linin pas Serbinë në garën për vendin e dytë.
Parashikimi i “OPTA”
Sipas superkompjuterit të “OPTA”-s, Polonia konsiderohet favorite për këtë sfidë. Në simulimet e kryera, polakët kanë fituar në 56.6% të rasteve brenda kohës së rregullt, ndërsa Shqipëria vetëm në 20.9%.
Megjithatë, edhe në rast fitoreje në Varshavë, Shqipërinë e pret një tjetër sfidë në finalen e “Rrugës B”, çka e bën rrugëtimin drejt Botërorit ende të vështirë.
Lini një Përgjigje