FLASH
Shkruar nga Pamfleti
Premier Liga nisi këtë të shtunë javën e tetë. Në 'City Ground', vendasit e Notingam Forest u mposhtën 0-3 nga Çelsi. Nëse sheh vetëm rezultatin të krijohet përshtypja e një tripikëshi të lehtë për 'Blutë', por në fushë gjërat nuk ishin të thjeshta.
Ishte Notingami që pati kontrollin e lojës në pjesën e parë, duke humbur disa raste për gol. Çelsi me Mareskën në tribunë ishte me fat që nuk pësoi dhe pjesa e parë u mbyll me rrjeta të paprekura.
Me nisjen e pjesës së dytë, konkretisht në minutën e 49, një pasim i Pedro Netos u devijua me kokë nga 19-vjeçari Açeampong dhe u ndal në rrjetë. Me euforinë e golit, Çelsi pa drejt sulmit dhe gjeti golin e dytë. Këtë herë Pedro Neto e ndali vetë topin në rrjetë.
Notingami u befasua dhe vendasit u tronditën nga dy golat e pësuar, aq sa presidenti Evangjelos Marinakis u largua nga tribuna. Vendasit goditën dy herë shtyllën gjatë një aksioni, por nuk qe e thënë që topi të ndalej në rrjetë.
Në minutën e 84 duhej Ris Xhejms që të 'vuloste' suksesin 0-3 dhe t'i dërgonte 'Blutë' në vendin e katërt në kuotën e 14 pikëve, dy më pak se kryesuesit e Arsenalit që kanë një ndeshje më pak. Në fund pati vend edhe për kartonin e kuq të Malo Gusto, me Çelsin që e mbylli me dhjetë futbollistë.
Sa i takon Notingamit, e ardhmja e trajnerit Ange Postecoglou është në diskutim dhe një shkarkim nuk do ishte surprizë. Me vetëm pesë pikë pas tetë ndeshje, Notingami mban vendin e 17, pa mundur të 'kopjojë' sezonin e shkuar që ishte surprizues.
Lini një Përgjigje