FLASH
Shkruar nga Pamfleti
Egnatia dha një tjetër sinjal force në garën për titull, teksa mposhti me rezultatin e thellë 0-4 Elbasanin në stadiumin “Air Albania”, në takimin e vlefshëm për fazën “Final Four” të Superiores.
Skuadra nga Rrogozhina e nisi sfidën me ritëm të lartë dhe praktikisht e vendosi fatin e ndeshjes që në pjesën e parë. Sulmuesi Bakajoko ishte protagonisti kryesor i 45 minutave të para, duke realizuar dy gola ndaj Elbasanit dhe duke vënë në vështirësi të vazhdueshme mbrojtjen kundërshtare.
Dominimi i kampionëve në fuqi vazhdoi edhe më tej, ndërsa Fernando realizoi golin e tretë, duke i dhënë Egnatias një avantazh të qartë para pushimit.
Në pjesën e dytë, skuadra e drejtuar nga Edlir Tetova administroi me qetësi rezultatin, duke kontrolluar lojën dhe ritmin e takimit. Megjithatë, rrogozhinasit nuk u ndalën me kaq dhe arritën të gjenin edhe golin e katërt me Aleksin, duke vulosur një fitore bindëse.
Me këtë sukses, Egnatia ngjitet në kuotën e 31 pikëve dhe merr kryesimin e renditjes në “Final Four”, duke hedhur një hap të rëndësishëm në garën për mbrojtjen e titullit kampion.
Nga ana tjetër, Elbasani mbetet gjithashtu me 31 pikë, por humbja e rëndë ndaj rivalëve direkt e komplikon situatën për vazhdimin e fazës finale. Tashmë skuadra elbasanase do të duhet të fokusohet te ndeshja e ardhshme për të rikuperuar terren në klasifikim.
Takimet e radhës në “Final Four” janë planifikuar të zhvillohen më 23 dhe 24 maj. Ndërkohë, në përballjen e parë të këtij formati të ri, Dinamo triumfoi 0-2 ndaj Vllaznisë, në sfidën e luajtur të shtunën.
Lini një Përgjigje