FLASH
Shkruar nga Pamfleti
Revista amerikane “Sports Illustrated” ka publikuar një analizë mbi 10 transferimet më të dobëta të sezonit aktual në Premier Ligë, ku pjesë e listës janë disa emra të njohur të futbollit europian. Në këtë renditje, sulmuesi i Kombëtares shqiptare, Armando Broja, mban vendin e gjashtë.
Lista kryesohet nga Aleksandër Isak, aktualisht pjesë e Liverpulit, ndërsa përfshirja e Brojës vjen në kontekstin e një sezoni të vështirë për të dhe klubin e tij, Bërnlin.
Investimi i Bërnlit dhe pritshmëritë
Sipas artikullit, Bërnli ka shpenzuar rreth 26.5 milionë dollarë (afërsisht 23 milionë euro) për transferimin e Brojës nga Çelsi. Kjo shumë është konsideruar e lartë në raport me performancën e sulmuesit në sezonet e fundit.
Artikulli thekson se ky investim nuk ka dhënë rezultatet e pritura, në një kohë kur skuadra po përballet me rrezikun real të rënies nga Premier Liga në Championship.
Materiali i “Sports Illustrated”, i publikuar në fund të muajit mars, është rishpërndarë së fundmi edhe nga platforma sportive “SPORTbible”.
Analiza e performancës së Brojës
Në analizën e bërë për sulmuesin shqiptar, theksohet se Broja ka qenë pjesë e pesë klubeve të ndryshme në Premier Ligë. Sipas vlerësimit, periudha më e suksesshme e tij mbetet ajo me Sauthemptonin, ku realizoi nëntë gola.
Në kontrast, eksperiencat te Çelsi, Fulhami, Evertoni dhe së fundmi te Bërnli cilësohen si zhgënjyese, duke ndikuar edhe në rënien e vlerës së tij në treg.
Një nga arsyet kryesore të kësaj ecurie janë dëmtimet e shpeshta, të cilat kanë penguar vazhdimësinë e tij në fushë. Deri më tani, Broja ka regjistruar 22 paraqitje dhe vetëm një gol me Bërnlin.
Pasojat për klubin
Sipas analizës, vendimi i Bërnlit për të investuar te Broja konsiderohet i gabuar që në fillim, për shkak të mungesës së golave në sezonet e fundit dhe historikut të dëmtimeve.
Në një moment kur skuadra përballet me një luftë të vështirë për mbijetesë, gabime të tilla në merkato mund të kenë pasoja të rënda për të ardhmen e klubit.
Lini një Përgjigje