FLASH
Shkruar nga Pamfleti
Mbrojtësi i Interit, Alesandro Bastoni, nuk do të paraqitet të premten në Prokurorinë e Milanos për t'iu përgjigjur pyetjeve të hetuesve, duke konfirmuar zërat që kanë qarkulluar gjatë orëve të fundit.
Lajmi u bë i ditur nga avokati i tij, Salvatore Skuto, i cili theksoi se klienti i tij kishte të drejtën ligjore të mos paraqitej dhe të mos u përgjigjej pyetjeve të prokurorëve.
"Lojtari kishte të drejtën të mos u përgjigjej pyetjeve të prokurorëve", deklaroi avokati Salvatore Skuto.
Më herët, Skuto e kishte cilësuar thirrjen nga Prokuroria si një "ftesë në errësirë", duke lënë të kuptohej se mungonin elemente të qarta mbi arsyet e marrjes në pyetje.
Sipas informacioneve të deritanishme, në hetim dallohen dy elemente kryesore. I pari lidhet me deklarimet e vajzës së përfshirë në çështje, e cila në kohën e ngjarjeve ishte 17 vjeç. Ajo ka përjashtuar Bastonin nga akuzat, duke deklaruar se nuk ka marrë kurrë para në këmbim të marrëdhënieve seksuale.
Elementi i dytë lidhet me bisedat e zbuluara në aplikacionet e komunikimit mes disa futbollistëve dhe Alesio Salamones, i cili akuzohet për organizimin e takimeve. Nga këto biseda rezulton se ekzistonte një tarifë prej 10 deri në 15 mijë euro për organizimin e mbrëmjeve me vajza.
Megjithatë, hetuesit theksojnë se ekzistenca e këtyre tarifave nuk provon se të gjithë personat e përfshirë kanë kryer pagesa.
Në një nga bisedat e publikuara, Bastoni diskuton me Salamonen për shpenzimet e një mbrëmjeje, përfshirë edhe transportin e vajzave.
Bastoni: "Sushi sa kushton afërsisht? Për gjashtë... 100 euro."
Salamone: "O mik, a mund të kushtojë ndonjëherë sushi 100 euro? Pastaj jemi tetë."
Më pas biseda vijon:
Bastoni: "Por këto tipet nuk hanë asgjë."
Salamone: "Njoh njerëz që paguhen 1.500 euro në muaj dhe janë më brilantë se ty."
Pikërisht këto pagesa janë pjesë e hetimit të Prokurorisë së Milanos, e cila synon të sqarojë nëse janë kryer pagesa të paligjshme në kuadër të organizimit të këtyre takimeve.
Ndërkohë, Prokuroria ka nisur marrjen në pyetje të disa futbollistëve në cilësinë e dëshmitarit. Të parët që janë dëgjuar nga prokuroret Rosaria Stagnaro dhe Bruna Albertini, në ambientet e Guardia di Finanza, kanë qenë Daniel Maldini dhe Kevin Bonifaci. Sipas kalendarit të hetimeve, të premten pritet të merret në pyetje edhe Rikardo Kalafiori.
Lini një Përgjigje